ՄԱԿ-ում ուսումնասիրում են կլիմայական հարցերով 16-ամյա ակտիվիստուհի Գրետա Տունբերգի բողոքը

ՄԱԿ-ի փորձագետներն ուսումնասիրում են կլիմայի փոփոխությունների դեմ պայքարում իշխանությունների անգործության դեմ 16-ամյա աշակերտուհի Գրետա Տունբերգի բողոքի դիտարկման հնարավորությունը: Այս մասին հայտնել է ՄԱԿ-ի գերագույն հանձնակատարի վարչության ներկայացուցիչը, գրում է korrespondent.net-ը:

Երեխայի իրավունքների մասին կոնվենցիայի երրորդ լրացուցիչ արձանագրությունը թույլ է տալիս անհատական գանգատներ ներկայացնել: Սովորաբար նախքան այդ պետք է դիմել ազգային դատական համակարգին: Բացառություններ հնարավոր են այն դեպքում, երբ գործը վերաբերում է համաշխարհային բնույթի խնդրին կամ երբ ազգային դատարաններում քննությունը երկարաժամկետ է լինում:

Հիշեցնենք, որ ՄԱԿ-ի կլիմայի հարցերին նվիրված գագաթնաժողովում շվեդ ակտիվիստուհի, 16-ամյա Գրետա Տունբերգը, որը համաշխարհային էկոլոգիական շարժման առաջնորդն է դարձել, ելույթ էր ունեցել երկրների ղեկավարների առաջ և մեղադրել էր պաշտոնյաներին՝ կլիմայական ճգնաժամը կանխելու համար անհրաժեշտ քայլեր չձեռնարկելու և գիտական փաստերն արհամարհելու համար, որոնք հաստատում են վերահաս էկոլոգիական աղետը:

«Ձեր դատարկ խոսքերով դուք գողացել եք իմ երազանքներն ու իմ մանկությունը: Մարդիկ տառապում են, մարդիկ մահանում են, էկոհամակարգերը ոչնչացվում են: Մենք զանգվածային ոչնչացման շեմին ենք, իսկ դուք միայն կարող եք խոսել փողերի և հավերժական տնտեսական աճի վերաբերյալ հեքիաթների մասին: Ինչպե՞ս եք համարձակվում»,- հայտնել էր դեռահաս ակտիվիստը: