Նավթի գնի կտրուկ աճ միջազգային շուկայում

Ընդամենը մի քանի ժամում նավթի գինը միջազգային շուկայում աճել է շուրջ 13 տոկոսով: Լոնդոնի բորսայում Brent տեսակի նավթի մեկ բարելի դիմաց այսօր 70 դոլար են վճարում:

Վառելիքի գնի կտրուկ աճը արձանագրվել է Սաուդյան Արաբիայի խոշորագույն նավթահորերից մեկի և նավթամշակման գործարանի դեմ անցած շաբաթավերջին իրականացված հարձակումներից հետո: Դրանց պատասխանատվությունը ստանձնեցին Եմենում գործող շիա զինյալները` հութիները: Իրանամետ զինյալների պնդմամբ՝ սաուդյան նավթային օբյեկտների դեմ հարձակումների ընթացքում մեկ տասնյակ անօդաչու հարվածային թռչող սարքեր են կիրառվել:

Հարձակումների հետևանքով Սաուդյան Արաբիան նավթի արդյունահանման օրական ծավալները նվազեցրել է 50 տոկոսով կամ շուրջ 6 միլիոն բարելով: