Ապագայում մարդիկ կկարողանան աշխատել շաբաթական ընդամենը 12 ժամ՝ գիտության և տեխնիկայի զարգացման շնորհիվ. Alibaba-ի հիմնադիր

Ապագայում մարդիկ կկարողանան աշխատել շաբաթական ընդամենը 12 ժամ՝ գիտության և տեխնիկայի զարգացման շնորհիվ։ Այս մասին հայտարարել է Alibaba Group Holding Ltd-ի համահիմնադիր Ջեկ Ման՝ արհեստական բանականության վերաբերյալ Շանհայում կայացած համաշխարհային կոնֆերանսի ժամանակ, գրում է The Economic Times-ը։

Ման նշել է, որ ներկայիս կրթական համակարգը հնացած է։ Նրա խոսքով՝ այն մոդելավորված է արդյունաբերական ժամանակաշրջանի համար, և նա կանխատեսում է այն օրը, երբ մեխանիզմները կկարողանան գերազանցել մարդկանց՝ հիշողության և կրկնվող հմտությունների ոլորտներում։ Նա ընդծել է, որ կրթական համակարգերն ապագայում պետք է օգնեն մարդկանց ավելի ստեղծագործ դառնալու։

Ման փորձել է լավատեսական փաստարկ ներկայացնել՝ նշելով, որ արհեստական բանականությունն ավելին կարող է անել մարդկանց համար, քան միայն նրանց աշխատանքը «խլելը»։

«Համակարգիչները միայն չիպեր ունեն, մարդիկ ունեն սիրտ։ Եվ հենց սիրտն է, որտեղից գալիս է իմաստությունը»,- ասել է նա։

Tesla Inc.-ի գլխավոր գործադիր տնօրեն Իլոն Մասկը, որը Մայի հետ նույն բեմում ելույթ է ունեցել, համաձայնել է վերջինիս խոսքերի հետ։ Օգտվելով առիթից՝ նա գովազդել է իր Neuralink նախագիծը, որը փորձում է միավորել մադկային ուղեղն արհեստական բանականության հետ։