19-րդ դարի հազվագյուտ նավամատյանները կվաճառեն աճուրդում

19-րդ դարի հազվագյուտ նավամատյանները կվաճառեն աճուրդում: Երեք մատյաններում, որոնք լրացվել են Թագավորական նավատորմի նավաստի Ֆրեդերիկ Ալենի ձեռագրով, պարունակվում է 1889-1893 թվականներին HMS Australia-ի միջերկրածովյան ճանապարհորդության ամենօրյա հաշվետվությունը, փոխանցում է PA-ն:

Նավաստի Ալենը գրում է ռազմական գործողությունների, խեղդվելու դեպքերի եւ ծովային հիվանդության մասին, ինչպես նաեւ թիմի իր ընկերներից մեկի՝ Ուիլյամ Ջորջի հավանական սպանության մասին, ում մահացած էին գտել 1891 թվականի մայիսին Հունաստանում ժայռի ստորոտին:

Մատյանները Սոմերսեթում Շեփթոն Մալեթի հնոտիի շուկայում նավաստու անձնական իրերի կոնտեյներում հայտնաբերել է մասնավոր հավաքորդը:

Հավաքորդը պարունակության նշանակության մասին գիտակցել է միայն սեփական ընդլայնված հետազոտություն անցկացնելուց հետո:

Ալենի կոնտեյներում կային լուսանկարներ, համազգեստ, ռազմածովային նավատորմի հրահանգներ եւ ձեռագիր գրառումներ: Այս բոլոր իրերը սեպտեմբերի 26-ին աճուրդի կդնի Gardiner Houlgate-ը:

«Սա բրիտանական ռազմածովային նավատորմի պատմության եզակի կտոր է: Սրանից ելնելով՝ մենք ակնկալում ենք, որ այն կվաճառենք մի քանի հազար ֆունտով»,- նշել է աճուրդի տան ներկայացուցիչը: