Արեւմտյան գերիշխանությունն աշխարհում ավարտվում է. Մակրոն

Արեւմտյան գերիշխանության դարաշրջանն աշխարհում մոտենում է ավարտին աշխարհաքաղաքական փոփոխությունների պատճառով։ Այս մասին երեքշաբթի ասել է Ֆրանսիայի նախագահ Էմանուել Մակրոնը՝ ելույթ ունենալով հանրապետության դեսպանների խորհրդակցությունում, տեղեկացնում է ՏԱՍՍ-ը։

«Մենք տեսնում ենք աշխարհում արեւմտյան հեգեմոնիայի ավարտը,- նշել է նա։- Հանգամանքները փոխվում են»։ Նրա խոսքով՝ «դա, մասնավորապես, նշանակում է նոր տերությունների ամրապնդում»։ «Չինաստանը դուրս է եկել առաջին շարք, իսկ Ռուսաստանը փորձում է հասնել մեծ հաջողության իր ռազմավարության հարցում»։

Մակրոնը նաեւ ասել է, որ Ֆրանսիային անհրաժեշտ է խորապես վերիմաստավորել եւ կառուցել նոր հարաբերություններ Ռուսաստանի հետ։ «Մենք գտնվում ենք Եվրոպայում, եթե մենք նոր հարաբերություններ չկառուցենք Ռուսաստանի հետ, ապա մենք կմնանք լարվածություններով, սառեցված հակամարտությամբ եւ սառը պատերազմի հետեւանքներով,- նշել է նա,- մենք պետք է խորապես վերիմաստավորենք մեր հարաբերություններն ու նորից կառուցենք դրանք»։ «Ամեն օր պետք է քայլեր անել այս ուղղությամբ»,- ասել է նա դեսպաններին։

Առանց Ռուսաստանի անհնար է կառուցել վստահության եւ անվտանգության նոր ճարտարապետություն Եվրոպայում, նշել է Ֆրանսիայի նախագահը։

Մակրոնն ավելացրել է, որ Ֆրանսիայի ԱԳ եւ զինված ուժերի նախարարությունների ղեկավարները մի քանի օրից կմեկնեն Մոսկվա՝ բանակցությունների։