Արմեն Սարգսյանի տարօրինակ լռությունը

Ամուլսարի հարցում արտահայտվեցին բոլորը՝ սկսած Նիկոլ Փաշինյանից, վերջացրած Պաղակն գյուղից հովիվ Արաշավիրով: Արտահայտվեցին բոլորը, բայց լռեց մեկը, որի կարծիքը շատերին է հետաքրքրում: Լռում է նախագահ Արմեն Սարգսյանը, որին ոմանք մեղադրում են «Լիդիանի» հետ շատ սերտ կապեր ունենալու մեջ:

Իհարկե, անկախ այս մեղադրանքներից եւ լուրերից, այս եւ այլ կարեւոր հարցերի շուրջ, կարծում ենք, նախագահը պետք է իր կարծիքն արտահայտի, անկախ նրանից, թե որքան լայն կամ նեղ են նրա լիազորությունները: Ի վերջո, շատերը, որոնք արտահայտվում են, ընդհանրապես որեւէ լիազորություն չունեն:

Այսօր, երբ նախագահի «Լիդիանի» հետ ունեցած կապերի մասին խոսակցություններն ավելի ու ավելի են շատանում, նա ոչ թե պետք է լուսանկար հրապարակի «Մանչեսթեր Սիթի» ֆուտբոլային թիմի մարզադաշտից, այլ հանդես գա կարճ եւ հստակ հայտարարությամբ եւ իր տեսակետն արտահայտի Ամուլսարի հանքի շահագործման վերաբերյալ:

Չենք ցանկանում, որ կրկնվի այն պատմությունը, որ միայն Նիկոլ Փաշինյանը տեսավ այն փաստաթուղթը, որով Արմեն Սարգսյանի նախագահ դառնալն այլեւս օրինական էր համարվում: Չենք ցանկանում, որ նույնը կրկնվի «Լիդիանի» դեպքում: Հանրությունը սպասում է հրապարակային պարզաբանման:

Որքան բաց ընթանան Ամուլսարի հետ կապված քննարկումները, որքան անկեղծ լինեն բարձրաստիճան պաշտոնյաններն, այնքան ավելի քիչ կլինեն պղտոր ջրում ձուկ որսացողները: 

Անհրաժեշտ են բաց եւ թափանցիկ, եւ, որ կարեւոր է, անկեղծ քննարկում առաջին հերթին ջերմուկցիների եւ հանքի մոտ գտնվող մյուս բնակավայրերի ակտիվի մասնակցությամբ: Ընդ որում, այդ քննարկումներին  հենց Ջերմուկում պետք է մասնակցեն եւ Արմեն Սարգսյանը, եւ Նիկոլ Փաշինյանը: Միայն այս դեպքում հարցը անհարկի շահարկողների թիվը կտրուկ կնվազի:

Ի վերջո, արդեն իսկ պարզ է, որ ուժային եղանակով կամ մարդկանց բքաբլիթ բաժանելով հնարավոր չի լինի շահագործել այդ հանքավայրը, եթե չլինեն իսկապես բաց եւ անաչառ քննարկումներ:

Հակոբ Ասատրյան

Top-News.am