Համացանցում են հայտնվել Մեգան Մարքլի արխիվային լուսանկարները, որոնցում նա իր ձեռքում պահում է Քեյթ Միդլթոնի պատկերով ամսագիրը (լուսանկարներ)

Համացանցում են հայտնվել ամերիկացի դերասանուհի Մեգան Մարքլի արխիվային լուսանկարները, որոնցում Սասեքսի դքսուհին իր ձեռքում է պահում ամսագիր, որի շապիկին պատկերված է Քեմբրիջի դքսուհի Քեյթ Միդլթոնը, գրում է Daily Mail-ը:

Աղբյուրի հաղորդմամբ՝ լուսանկարն արվել է արքայազն Հարիին հանդիպելուց երկու տարի առաջ:

Թագավորական ընտանիքի երկրպագուները մեծ ոգևորությամբ մոռացված լուսանկարը տարածել են համացանցում, որն ի սկզբանե հրապարակել էր իռլանդական U ամսագրի գլխավոր խմբագրի տեղակալ Սենիս Քեշը՝ դեռևս 2017 թվականին:

Լուսանկարում Մեգան Մարքլը Քեմբրիջի դքսուհու նկարով ամսագիրը ձեռքին ժպտում է տեսախցիկին: Նրա կողքին կանգնած է ամսագրի գլխավոր խմբագրի տեղակալը:

Հաղորդվում է, որ Սասեքսի դքսուհին այդ ժամանակ նկարահանվում էր Suits սերիալում և, ըստ տեղեկությունների, իր մասնակցությունն է ունեցել ամսագրի տվյալ համարում՝ նյութ գրելով արևային ակնոցների մասին:

«Ծիծաղելի է, որ կյանքը կարող է նման անակնկալներ մատուցել»,- գրել է օգտատերերից մեկը:

«Վստահ եմ՝ նրա (Մեգան Մարքլ) մտքով երբեք չէր անցնի, որ մի օր կարող է թագավորական ընտանիքի անդամ դառնալ»,- գրել է մեկ այլ օգտատեր:

Մեգանի՝ թագավորական ընտանիք մուտք գործելուց հետո, լուրեր էին շրջանառվում, որ Սասեքսի և Քեմբրիջի դքսուհիների հարաբերությունները լարված են, սակայն կանայք վերջերս քանիցս միասին հայտնվել են հանրային վայրերում՝ վերջ դնելով նման խոսակցություններին: