Ռուհանին ԱՄՆ-ից պահանջել է փոխել Մերձավոր Արևելքի նկատմամբ մոտեցումը

Կատարի էմիր Թամիմ բեն Համադ էլ Թանիի հետ զրույցի ժամանակ Իրանի նախագահ Հասան Ռուհանին ասել է, որ ԱՄՆ-ն պետք է փոխի տարածաշրջանի նկատմամբ իր սխալ քաղաքականությունը, փոխանցում է «ՌԻԱ Նովոստի»-ն։

Ավելի վաղ ԱՄՆ-ն հայտարարել է, որ ծրագրում է միջազգային կոալիցիա ստեղծել՝ Իրանի և Եմենի մերձակայքի ջրերը պարեկավորելու համար։

«Թեհրանը վստահ է, որ լարվածության նվազեցումը բոլորի օգտին կլինի։ Հույս ունենք, որ ամերիկացիները կհասկանան՝ իրենց ընտրած ուղին սխալ է, և դրանում հաղթողներ չեն լինի։ Նրանց անհրաժեշտ է փոխել վարքագիծը»,-ասել է Ռուհանին։

Նա նաև նկատել է, որ Պարսից ծոցում որոշ երկրներ իրենց գործունեությամբ փորձում են բարդացնել տարածաշրջանում իրադրությունը։ Իրանի նախագահն ընդգծել է, որ Թեհրանը շահագրգռված է բարեկամ երկրների հետ տարածաշրջանային անվտանգության շուրջ երկխոսությունը շարունակելու հարցում։