Թուրքիան դիտարկում է ռուսական Су-35 կործանիչները գնելու հնարավորությունը. «Յենի Շաֆաք»

Թուրքիան ամերիկյան F-35 կործանիչների արտադրության ծրագրին մասնակցությունից զրկվելուց հետո դիտարկում է ռուսական Су-35 կործանիչները գնելու հնարավորությունը, գրում է թուրքական «Յենի Շաֆաք» թերթը:

Թերթի տվյալների համաձայն՝ Թուրքիայի պաշտպանական գերատեսչության ներկայացուցիչներին ուղղված Մոսկվայի համապատասխան առաջարկը դիտարկելու խնդրանքով դիմել են անձինք, որոնք պատասխանատու են երկրի զինուժի համար գնումների համար:

Եթե զինվորականները հավանություն տան Су-35-ի գնման հեռանկարին, Անկարան պաշտոնապես կսկսի «Ռոսօբորոնէքսպորտ»-ի հետ բանակցությունները, գրում է թերթը:

Թուրքիային բազմաթիրախային Cу-35 կործանիչներ վաճառելու Ռուսաստանի պատրաստակամության մասին հուլիսին հայտնել էր «Ռոստեխ» ընկերության ղեկավար Սերգեյ Չեմեզովը:

Ռուսական С-400 հակաօդային պաշտպանության համակարգերի գնումը ՆԱՏՕ-ի անդամ Թուրքիայի կողմից միջազգային սկանդալ է հրահրել. Միացյալ Նահանգները պահանջում է հրաժարվել գործարքից և փոխարենը ձեռք բերել ամերիկյան Patriot համակարգեր: Հրաժարվելու դեպքում Վաշինգտոնը հետևանքներով է սպառնացել:

Հիշեցնենք, որ Ռուսաստանի Դաշնության և Թուրքիայի միջև С-400 համակարգերի գնման շուրջ բանակցությունների մասին առաջին անգամ հայտնի էր դարձել 2016թ.-ի նոյեմբերին, իսկ վաճառքի մասին պայմանագիրը կնքվել էր 2017թ.-ի սեպտեմբերին, ընդ որում՝ ձեռք բերված զենիթահրթիռային 4 միավոր համակարգերի արժեքը 2,5 մլրդ դոլար է կազմել:

Հուլիսի 12-ին ռուսական C-400 համակարգերի առաջին խմբաքանակը մատակարարվել է Թուրքիա: ԱՄՆ մի խումբ սենատորներ կոչ են արել նախագահ Թրամփին պատժամիջոցներ սահմանել Թուրքիայի դեմ` ռուսական C-400-ների մատակարարման մեկնարկի առնչությամբ:

Միևնույն ժամանակ, Թուրքիայի նախագահ Ռեջեփ Թայիփ Էրդողանը C-400 համակարգերի մատակարարման գործարքը Ռուսաստանի հետ երկրի ժամանակակից պատմության կարևորագույն համաձայնագիր է անվանել: Էրդողանի խոսքով՝ C-400-ների մատակարարման գործընթացը, որը մեկնարկել է հուլիսի 12-ին, կարող է ավարտվել 2020-ի ապրիլին: