Արաբ շեյխի կին ներկայացածը կողոպտել է փարիզյան խանութը

Փարիզի ոսկերչական խանութից անհայտ կինը զարդեր է գողացել՝ ձեւանալով դուբայցի տիրակալի կին, հայտնում է BFM TV-ն:

Հեռուստաալիքի տեղեկություններով՝ հուլիսի 31-ին Փարիզի լյուքս ոսկերչական խանութներից մեկն են մտել 2 կին: Նրանցից մեկը ներկայացել է Դուբայի շեյխի կին, մյուսը ներկայացվել է որպես նրա օգնական: Վաճառողի խոսքով՝ մինչ նրանք զարդեր էին ընտրում, բազմիցս զանգահարել են խանութ:

Վերջում կինը խոստացել է ընտրած թանկարժեք զարդերի գումարը խանութին փոխանցել հաջորդ օրը: Դրանից հետո ծանրոցը պետք է ուղարկեին նշված հասցեով: Սակայն նշված օրը փողը չի ստացվել, իսկ աշխատակիցները տուփի մեջ զարդերի փոխարեն, արգանակի խորանարդիկներ են հայտնաբերել:

Հափշտակված ոսկերչական իրերի ընդհանուր գումարը կազմում է մոտ 1,3 մլն եվրո: Փարիզի ոստիկանությունը քննություն է սկսել կողոպուտի փաստով:

Հուլիսին Բրազիլիայում Սան Պաուլուի օդանավակայանում չարագործները ոստիկան էին ձեւացել եւ գողացել 750 կգ ոսկի ու այլ թանկարժեք մետաղներ: Հափշտակվածի ընդհանուր արժեքը գնահատվել է 40 մլն դոլար: