Աշխարհի ամենաանփույթ ամուսինը պայթեցրել է ջեռոցը, հալեցրել սառնարանի պլաստիկը և ոչնչացրել բազմոցը

Շոտլանդական Էդինբուրգ քաղաքի բնակչուհին հայտարարել է, որ իր ամուսինը Մեծ Բրիտանիայի ամենաանփույթ տղամարդն է: Կինը Daily Mail-ին պատմել է իր ամուսնու բազմաթիվ անհաջողությունների ու ձախողումների մասին:

«Քրեյգը քայլող աղետ է: Այն ամենը, ինչին նա դիպչում է, փոշու է վերածվում: Ես կյանքում ավելի անփույթ մարդու չեմ հանդիպել»,- պատմել է 55-ամյա Դեբի Սթիվենսը:

Նա պատմել է, որ ամուսնության հաջորդ տարում իսկ իր ամուսինը հասցրել է պայթեցնել իրենց տան ջեռոցը՝ սխալմամբ տարբեր գույն ունեցող լարերը միմյանց միացնելով: Իսկ սառնարանն արագ հալեցնելու համար էլեկտրական տաքացուցիչ է օգտագործել, որի հետևանքով պլաստիկը հալվել է: Իսկ նոր գնած բազմոցի վրա պատահմամբ ներկ է թափել:

Նա նաև պատմել է, որ մի անգամ էլ իր ամուսինը, նստած լինելով հետևի նստատեղին, կայանած մեքենան հարվածել է պատին: Նա հիշել է, որ իրենք մեքենայով կանգ են առել սննդի կետերից մեկի մոտ, որպեսզի ինքն օգտվի սանհանգույցից: Դուրս գալով՝ տեսել է, որ մեքենան հարվածել է շենքի պատին ու բավականին վնասվել է: Պարզվել է, որ իր ամուսինը մեքենայի ետնամասից ձգվել է, որ փոխի մեքենայում հնչող երաժշտությունն ու պատահմամբ դիպել է մեքենայի արգելակին: