Սամվել Բալասանյանի խոստումները՝ իրականության օրակարգից դուրս

«Մեր ծրագիրը յուրօրինակ փաստաթուղթ է Գյումրի քաղաքում ընթացիկ քառամյակի ընթացքում մեր կողմից իրականացրած եւ առաջիկա հնգամյակի ընթացքում իրականացվելիք աշխատանքների եւ ռազմավարական մոտեցումների վերաբերյալ»,- այս տողերով է սկսվում Գյումրու քաղաքապետ Սամվել Բալասանյանի 2016 թվականի նախընտրական խոստումների ծրագիրը:

Մի կողմ դնենք այն, որ հնգամյակի մասին հիշատակումից եւ կեղծ պաթոսից սովետահոտ է գալիս եւ կենտրոնանանք կոնկրետ խոստումների վրա: 

2016 թվականի հոկտեմբերի 2-ին տեղի ունեցած ընտրությունից հետո քաղաքապետ դարձած Սամվել Բալասանյանի խոստումները սկսվում են կանաչապատումներ իրականացնելով:

Կառավարող ՀՀԿ-ի թեկնածու Սամվել Բալասանյանը խոստանում է քաղաքի կանաչ տարածքները 110 հեկտարից դարձնել 115: Խոստացել է նաեւ տնկել 20 հազար ծառ, իսկ 4.2 հա ծաղկանոցները դարձնել 5.2 հա:

Սամվել Բալասանյանը նաեւ վստահորեն նշում է, որ իր ղեկավարման չորս տարիներին՝ 2012-ից 2016 թվականներին, Գյումրու կանաչ տարածքները ավելացել են 10 հեկտարով:
Այս իրականացրած եւ իրականացվելիք ծրագրերին զուգահեռ՝ Գյումրու ծառերը լուրջ հիվանդություն ունեն, որոնց մասին քաղաքապետի արածների եւ անելիքի մեջ որեւէ անդրադարձ չկա: Հարկ է նշել, որ Գյումրու ծառերը դեղորայքային մշակման չեն ենթարկվում:

Գյումրու քաղաքապետարանի բնակկոմունալ եւ շրջակա միջավայրի պահպանության բաժնից փոխանցում են, որ ծառերի խնամքին հատկացվող գումարը քիչ է, իսկ թունաքիմիկատի 1 կիլոգրամը վաճառվում է 10 հազար դրամով: Ծառերի համար նախատեսված գումարը բավարարում է միայն էտման եւ ջրելու գործընթացը կազմակերպելու համար: Ծրագրից դուրս է մնում թունաքիմիկատներով եւ այլ հատուկ դեղորայքով խնամքի իրականացումը: Բնապահպանները սա լուրջ խնդիր են համարում:

«Թունաքիմիկատ եթե չի օգտագործվում, ծառերի վարակը տարածվում է, ինչը շատ վտանգավոր է»,- ասում է բնապահպաններից մեկը:

Բնապահպանները, դեղորայքային մշակումից զատ, Գյումրիում իրականացրած ծառերի էտման սխալ ժամանակագրության մասին են բարձրաձայնում. սխալ ժամանակահատվածում կատարված էտի հետեւանքով քաղաքում մաքուր օդն է բացակայում:

Եվ, եզրափակելով Սամվել Բալասանյանի կանաչապատման մասին խոստումներն այն մասին, թե ցուցաբերելու է հետեւողականություն՝ կանաչ գոտիների պահպանման հարցում, նշենք, որ Գյումրիում բավականին վերջերս քաղաքապետարանի թույլտվությամբ իրականացվել է երիտասարդ ծառերի հատում: Թեեւ Գյումրու քաղաքապետարանից պարզաբանեցին, որ իրենք միայն թույլատրել էին էտ, սակայն բնակիչը, օգտվելով քաղաքապետարանի անտարբեր վերաբերմունքից, հատել է ըստ քմահաճույքի:

Հուսանք, որ Սամվել Բալասանյանը, «առաջիկա 5 տարում հետեւողականություն ցուցաբերել» ասելով այս ամենի շարունակականությունը նկատի չունի:

(Շարունակելի)

Դավիթ Գասպարյան

Գյումրի