«Դա երիտասարդների խաղ է». Բրեդ Փիթը մտադիր է ավարտել կարիերան

Հոլիվուդյան հայտնի դերասան Բրեդ Փիթը GQ ամսագրին տված հարցազրույցում ակնարկել է դերասանական կարիերան ավարտելու մասին՝ նշելով, որ ցանկանում է ճանապարհը երիտասարդներին զիջել, գրում է people.com-ը:

«Ես իսկապես կարծում եմ, որ կինոն երիտասարդների խաղ է: Չեմ ասում, թե ավելի տարեց դերասանների համար կարևոր դերեր չկան, պարզապես զգում եմ, որ այդ խաղն առաջ կգնա իր բնական հունով, բնական ընտրության սկզբունքով»,- ասել է Փիթը:

Նա հույս է հայտնել, որ ֆիլմարտադրության մեջ տեղ կա թե՛ երիտասարդ, թե՛ փորձառու դերասանների համար, սակայն չի բացառել, որ ինքը կարող է ոլորտում «դինոզավր» լինել՝ առանց այդ մասին իմանալու:

Նա հավելել է, որ մտադիր է ամեն տարի ավելի ու ավելի քիչ նկարահանվել ֆիլմերում՝ ի վերջո իրեն ռեժիսորի և պրոդյուսերի աշխատանքին նվիրելով:

«Ամեն դեպքում ինձ հետաքրքիր է հետևել, թե ինչպիսին կլինի կինոյի ապագան, ինչ ձև կստանա այն: Ինձ շատ են դուր գալիս սթրիմինգ ծառայությունները, մեզ ավելի շատ որակյալ նախագծեր են մատուցվում, ավելի ու ավելի շատ սցենարիստներ ու դերասաններ են ի հայտ գալիս, ինչը միայն վկայում է բազմաթիվ տաղանդավոր մարդկանց գոյության մասին»,- ասել է 55-ամյա դերասանը:

Որոշ լրատվամիջոցների տվյալներով՝ Փիթը ցանկանում է թողնել դերասանական կարիերան ոչ միայն տարիքի, այլև երեխաների հետ ավելի շատ ժամանակ անցկացնելու համար, որոնց հետ նախկին կնոջից՝ Անջելինա Ջոլիից բաժանվելուց հետո ավելի քիչ է տեսնվում: