Ամստերդամի քաղաքապետը շնորհակալություն է հայտնել Դալուզյանին

Ամստերդամի քաղաքապետարանի պատվիրակությունը, քաղաքապետ Ֆեմկե Հալսեմանի գլխավորությամբ, քիչ առաջ այցելել է հոսպիտալ, որտեղ տեղափոխվել է Մել Դալուզյանը։ Ինչպես գրել են նախկին ծանրամարտիկի ընկերները, Ամստերդամի քաղաքապետը երախտագիտություն հայտնել Մելին։ Կին քաղաքապետը նրան ծաղիկներ է տարել։

«Ձեր արարքը հերոսական է։ Հպարտ եմ, որ Ամստերդամը ձեր պես բնակիչ ունի։ Քաղաքացիական բարձր գիտակցությունն օրինականության և համերաշխ, անվտանգ ու բոլորի համար հարմարավետ միջավայրի գրավականն է։ Երախտապարտ եմ զինված դիմակավորների հակաիրավական գործողություններն արդյունավետ կերպով կասեցնելու համար։ Շուտափույթ ապաքինում եմ մաղթում և վստահեցնում եմ, որ քաղաքապետարանը պատրաստ է անհրաժեշտ ամեն ինչով աջակցել ձեզ»,-ընկերների փոխանցմամբ, մասնավորապես ասել է քաղաքապետը։

Նրանք տեղեկացնում են, որ փաստի առթիվ հարուցվել է քրեական գործ, ընթանում է քննություն։ Մելի վիճակը գնահատվում է կայուն։

Հիշեցնենք, որ նախկին մարզիկը գետին է տապալել խանութի աշխատակցի վրա հարձակված գողերին, ինչի հետևանքով ստացել է դանակի հարվածներ։