Աշխատակիցները, որոնք ստիպված են հաճախորդներին մշտապես ժպտալ, էմոցիոնալ սպառման պատճառով շատ են խմում

ԱՄՆ Փենսիլվանիա նահանգի համալսարանի եւ Բուֆալոյի համալսարանի գիտնականները պարզել են, որ այն աշխատակիցները, որոնք ստիպված են հաճախորդներին մշտապես ժպտալ, աշխատանքային հերթափոխի ավարտից հետո շատ են խմում: Ոգելիցի հանդեպ հակման պատճառը աշխատանքային օրվա ընթացքում էմոցիոնալ սպառումն է:

Ռիսկի խմբի մեջ են մտել, մասնավորապես, բուժքույրերը, բարմենները եւ քոլ-կենտրոնների աշխատակիցները: Փորձագետները համոզված են, որ կեղծ ժպիտը, որը մարդկանց ստիպում է թաքցնել կամ ճնշել իրենց իրական զգացումները, սթրես եւ բացասական զգացումներ է առաջացնում: Արդյունքում աշխատակիցները, որոնք ստիպված են մշտապես ժպտալ, փորձում են հանգստանալ սպիրտայինի միջոցով:

Գիտնականները նշում են՝ մարդը որքան հաճախ է ստիպված աշխատավայրում վերահսկել իր բացասական զգացումները, այնքան հազավադեպ է վերահսկում աշխատանքից հետո ալկոհոլի գործածումը:

Հետազոտության շրջանակում վերլուծվել են ԱՄՆ-ում 1592 աշխատակիցների շրջանում անցկացված հարցման տվյալները: Նրանք պետք է հայտնեին, թե որքան հաճախ են իրենց զգացումները ձեւացնում կամ ճնշում, եւ որքան ալկոհոլ են խմում աշխատանքից հետո: Պարզվել է, որ ոգելից խմիչքների գործածման մակարդակը բարձր է նրանց շրջանում, ովքեր աշխատավայրում ստիպված են մարդկանց հետ հաճախ շփվել: Սա առաջին հերթին վերաբերում է նրանց, ովքեր ստիպված են հաճախորդների հետ անհատապես շփվել: Այսպես՝ քոլ-կենտրոնների կամ սրճարանների աշխատակիցներն ավելի շատ են խմում, քան կրթության կամ առողջապահության ոլորտների ներկայացուցիչները:

Մի կողմից՝ աշխատավարձը մարդուն մոտիվացնում է, որ մշտապես ճնշի իր իրական զգացումները: Մյուս կողմից՝ ամենօրյա ինքնավերահսկողությունը օրգանիզմի համար կարող է լինել բավականին մեծ ծանրաբեռնվածություն, հատկապես եթե մարդն իր աշխատանքն անօգուտ է համարում: Օրինակ՝ բուժքրոջ համար ավելի է հեշտ է ձեւացնել հանուն պացիենտի բուժման, մինչդեռ մարդը, որը հաճախորդին տեսնում է կյանքում առաջին եւ վերջին անգամ, դա կարող է բավականին մեծ փորձություն լինել:

Հետազոտության արդյունքները հրապարակվել են Journal of Occupational Health Psychology ամսագրում: