«Մարգարիտա Սիմոնյանը լեզու է գտել Տիգրան Քեոսյանի երեխաների հետ և ընկերացել նրա նախկին կնոջ հետ». Լերա Կուդրյավցևա

Ապրիլի 6-ին ռուսական НТВ հեռուստաալիքով հեռարձակվող «Միլիոնանոց գաղտնիք» հաղորդման հյուրը կլինի ռուսաստանաբնակ հայ լրագրող, RT հեռուստաընկերության և Russia Today միջազգային լրատվական գործակալության գլխավոր խմբագիր Մարգարիտա Սիմոնյանը, ինչին ընդառաջ հաղորդման հաղորդավարուհի Լերա Կուդրյավցևան woman.ru-ի լրագրողների հետ կիսվել է հյուրի հետ հանդիպման տպավորություններով:

Հաղորդավարուհին իր հիացմունքն է հայտնել ուժեղ կանանց նկատմամբ՝ նշելով, որ Մարգարիտա Սիմոնյանն այն կանանցից է, որոնք անհրաժեշտ չեն համարում թաքնվել տղամարդու մեջքի ետևում և ամեն ինչի հասնում են սեփական ուժերով:

Կուդրյավցևան, խոսելով լրագրողի և նրա ամուսնու՝ ռեժիսոր Տիգրան Քեոսյանի մասին, պատմել է, որ Սիմոնյանն ամուսնու՝ առաջին ամուսնությունից ունեցած երեխաների հետ ընդհանուր լեզու է գտել, ինչպես նաև ընկերացել է նրա նախկին կնոջ՝ ռուս դերասանուհի Ալյոնա Խմելնիցկայայի հետ:

Հաղորդավարուհու խոսքով՝ Մարգարիտան հույս ունի, որ իր երեխաները չեն հետևի իր մասնագիտական ուղուն, քանի որ լրագրող լինելը շատ վտանգավոր աշխատանք է: Վերջինս բազմիցս հայտնվել է թեժ կետերում և «սարսափելի բաներ» է տեսել, որոնք հազիվ թե կարողանա երբևէ հիշողությունից ջնջել:

Հիշեցնենք, որ Սիմոնյանը և Քեոսյանն ամուսնացել են 2012թ.-ին և այժմ սպասում են երրորդ երեխայի ծնունդին: