Մեծ Բրիտանիայում 8-ամյա տղան լողափով զբոսնելիս մամոնտի ատամ է գտել

Մեծ Բրիտանիայում Սեբաստիան անունով 8-ամյա տղան իր ընկերների հետ Չարմութի լողափով զբոսանքի ժամանակ պատահմամբ հնագիտական կարևոր հայտնագործություն է կատարել:

Ինչպես գրում է Daily Mail-ը, Սեբաստիանն ու իր ընկերները մամոնտի ատամ են գտել: Գիտնականները կարծում են, որ ատամը պատկանել է 40 000 տարի առաջ ապրած բրդոտ մամոնտի, ինչը հազվագյուտ է դարձնում փոքրիկ Սեբաստիանի գտածոն:

Լոնդոնի «Հոլոուեյ» թագավորական քոլեջի պրոֆեսոր Դանիել Շրևը նշել է, որ ատամը շատ մաշված է, և առայժմ բարդ է ասել՝ այն պատկանել է կենդանու վերին, թե ստորին ատամնաշարին:

Նրա խոսքով՝ կենդանին ապրել է շուրջ 25 000-65 000 տարի առաջ: