Արաբական շեյխը դարձել է ինքնատիպ 11 մետրանոց ամենագնացի սեփականատերը

Հարուստ մարդիկ արդեն երկար ժամանակ է ոչ ոքի չեն զարմացնում իրենց շքեղ ավտոմեքենաներով եւ հսկայական զբոսանավերով: Սակայն տարբերվելու ցանկությունը դեռեւս արդիական է: Արաբական շեյխերից մեկը որոշել է գերազանցել իր բոլոր «գործընկերներին» եւ ստիպել է ինժեներներին կառուցել պատմության մեջ ամենամեծ եւ հզոր ամենագնացը, հաղորդում է «360» հեռուստաալիքը:

Տասն անիվ ունեցող գազանն ունի 11 մ երկարություն:

Արաբական շեյխ Համդան բին Համդան ալ Նահայանն իրագործել է իր երազանքն ու գնել աշխարհում ամենամեծ ամենագնացի միակ նմուշը: Տասնմեկ մետր երկարություն ունեցող Dhabiyan ավտոմեքենան ստեղծել են հատուկ շեյխի համար Oshkosh M1075 ամերիկյան ռազմական ավտոմեքենայի հիման վրա: Յուրահատուկ «ձիու» հզորությունը 600 ձիաուժ է, իսկ տեղաշարժվում է այն միանգամից տասն անիվների վրա:

Փորձագետները պնդում են, որ մասնագետները թափքի առաջնամասը փոխառել են նախորդ դարի 40-ականների բեռնատարից, սրահը՝ Jeep Wrangler Unlimited ժամանակակից ամենագնացից, իսկ հետեւի բամպերը՝ Dodge Dart շքեղ ավտոմեքենայից: