Ալեքսանդր Ռևայի հայազգի կինը պատմել է ընտանեկան երջանկության մասին (լուսանկարներ)

Ռուս հայտնի հումորիստ, Comedy Club-ի ռեզիդենտ Ալեքսանդր Ռևայի հայազգի կինը՝ Անժելիկան, Woman.ru կայքին տված հարցազրույցում պատմել է ընտանեկան երջանկության, ամուսնու հետ փոխհարաբերությունների, դուստրերի դաստիարակության մասին:

Անժելիկան, որը 12 տարի ամուսնացած է հումորիստի հետ, ընդգծել է, որ սիրելի անձը դիմացինի համար չպետք է «մինչև վերջ կարդացած գիրք» դառնա, այլապես հետաքրքրությունը կկորչի:

«Պետք է փորձել անընդհատ ոգեշնչում գտնել, դիմացինին նայել այնպես, ինչպես առաջին անգամ: Անընդհատ ինչ-որ հետաքրքիր բանի սպասում ունենալ: Այն, ինչ մենք ակնկալում ենք, այն էլ ստանում ենք»,-նշել է նա:

Միևնույն ժամանակ նա նկատել է, որ ամուսնու գերծանրաբեռնված աշխատանքային գրաֆիկը, ազատ ժամանակի անբավարարությունն ազդում է ընտանիքի վրա:

«Կյանքը մեկն է, երեխաներն արագ են մեծանում, և քանի դեռ մենք երիտասարդ ենք, ցանկանում ենք ճամփորդել, նոր տպավորություններ ստանալ: Բայց, ցավոք, այդպիսի հնարավորություն չունենք: Եթե ինչ-որ տեղ ենք գնում, ապա շատ կարճ ժամանակով՝ 2-3 օրով»,-պատմել է Անժելիկան:

Նա խոստովանել է, որ իրենց տանը «բացարձակ հայրիշխանություն» է:

«Ես երբեք չեմ հակաճառում ամուսնուս, կարող եմ միայն շատ նուրբ ձևով ինչ-որ խորհուրդ տալ: Նույնիսկ եթե ինչ-ինչ հարցերում տարակարծիք ենք լինում, ես ոչ կպչուն ձևով առաջարկում եմ իմ տարբերակը: Չէ՞ որ կինը պետք է աջակցի տղամարդուն, այլ ոչ թե ճնշի նրան: Միևնույն ժամանակ ես միանշանական ինքնաբավ մարդ եմ»,-ասել է Անժելիկան:

Ռևայի կինը հավելել է, որ հարաբերություններում պետք է ճկուն լինել, աջակցել քո տղամարդուն, հիանալ նրանով:

«Իմ կարծիքով՝ հենց դա է երջանիկ, հարատև ամուսնության բանալին»,-եզրափակել է նա: