Եվգենի Պետրոսյանը Մոսկվայի իրենց բնակարանը վարձակալման է տալիս այնտեղ ապրող Ելենա Ստեպանենկոյի հետ միասին

Եվգենի Պետրոսյանը Մոսկվայի իրենց բնակարան-թանգարանը վարձակալման է տալիս այնտեղ ապրող Ելենա Ստեպանենկոյի հետ միասին

Հայտնի հումորիստներն ամուսնալուծվել են 2018-ի նոյեմբերին, սակայն ունեցվածքի բաժանման գործընթացը դեռևս շարունակվում է:

Ինչպես գրում է kp.ru-ն, 29 տարվա համատեղ կյանքի ընթացքում Եվգենի Պետրոսյանն ու Ելենա Ստեպանենկոն բավականաչափ ունեցվածք են կուտակել, որը ներառում է ավելի քան 10 բնակարան Մոսկվայում, հաշվեհամարներ և ավելի քան 5000 արվեստի գործ՝ գրքեր, նկարներ, ճենապակի և այլն:

Ամենից շատ խնդիրներ են առաջացել՝ կապված մայրաքաղաքում գտնվող ամենամեծ բնակարանի հետ, որում ամուսինները ժամանկին միասին են բնակվել: Այն անվանում են նաև բնակարան-թանգարան: Այժմ 512 քառ. մետր մակերեսով տանն ապրում է միայն Ստեպանենկոն:

Պետրոսյանի փաստաբանի խոսքով՝ Ստեպանենկոն չի ցանկանում տեղափոխվել բնակարանից և նախկին ամուսնուն էլ չի թողնում մտնել այնտեղ: Վաճառել նույնպես չի համաձայնում: Ի դեպ, տարաձայնություններ կան նաև բնակարանի գնի շուրջ:

Ինչպես փաստաբանը նշել է, տան կոմունալ ծառայությունների դիմաց վճարում կատարում է Պետրոսյանը, սակայն նրա հաշիվները սառեցվել են, և եղած գումարն այլևս չի բավականացնում վարձերը վճարելուն: Եվ քանի որ դերասանուհին հրաժարվում է ինքնուրույն վճարել, նրանք առաջարկել են բնակարանը վարձակալման հանձնել այնտեղ ապրող դերասանուհու հետ միասին, որպեսզի վարձակալները վճարեն կոմունալ ծախսերն ու գումար տրամադրեն Ստեպանենկոյի բնակության համար: