Հաքերները սպառնացել են ջնջել iPhone–ի 300 միլիոն օգտատերերի տվյալները
Չարագործները խոստացել են գնալ այդ քայլին, եթե Apple-ը խոշոր գումար չվճարի իրենց մինչեւ 2017 թվականի ապրիլի 7-ը։
Turkish Crime Family մի խումբ հաքերներ «Apple» կորպորացիայի ներկայացուցիչներից պահանջել են 75 հազար դոլար՝ կրիպտոդրամով կամ iTune-ի 100 հազար դոլարի նվեր քարտ։ Իսկ եթե հրաժարվեն վճարել, ապա չարագործները խոստացել են ջնջել iCloud-ի միլիոնավոր հաշիվներ։
Հաքերները ներկայացրել են խմբավորման եւ Apple-ի անվտանգության թիմի անդամների նամակագրության սքրինշոթերը։ Բացի այդ, հաքերները «Motherboard» պարբերականի լրագրողներին հնարավորություն են տվել մուտք գործել այն էլեկտրոնային փոստը, որն օգտագործվել է «խնձորային» կորպորացիայի հետ հաղորդակցման համար։
Turkish Crime Family–ի անդամները նաեւ YouTube–ում տեղադրել են տեսահոլովակ, որտեղ ցուցադրել են iCloud-ից գողացված հաշիվների տվյալներ, ցույց տալու համար, որ իրենք հեշտությամբ կարող են ջնջել ցանկացած ինֆորմացիա։
«Առաջին հերթին խնդրում ենք հեռացնել տեսանյութը YouTube-ից, քանի որ այն ավելորդ ուշադրություն է գրավում։ Երկրորդը՝ կուզեինք ձեզ տեղեկացնել, որ մենք չենք պարգեւատրում կիբերհանցագործներին՝ օրենքի խախտման համար»,– հաքերներին պատասխանել են Apple-ի աշխատակիցները։
Պարբերականի լրագրողները հաղորդել են, որ սպառնալիքը կարող է եւ կեղծ լինել. իրենց հաղորդագրություններից մեկում հաքերները խոսում էին 300 միլիոն հաշիվներ մուտքի հնարավորության մասին, սակայն ավելի ուշ, խմբի մեկ այլ անդամ հաստատում էր, որ կոտրել են 559 միլիոն գրառումներ։