«Ադելը չափազանց գեր է», «Քիմը մեղավոր է», «Պիպայի դեմքը լավը չէ». աստղեր, որոնց «խայթել» է Կառլ Լագերֆելդի «սուր լեզուն»

Ֆրանսիական Chanel նորաձևության տան կրեատիվ դիզայներ Կառլ Լագերֆելդն առանձնահատուկ դիրք ուներ նորաձևության ոլորտում ու հայտնի էր իր «սուր լեզվով», աստղերին ուղղված անողոք քննադատություններով: Հաճախ տաղանդաշատ գերմանացին իր արտահայտությունների պատճառով հայտնվում էր սկանդալների կենտրոնում ու լարվածություն մտցնում աստղերի հետ հարաբերություններում:

Daily Mail-ն անդրադարձել է Լագերֆելդի աստղային քննադատություններից մի քանիսին:

Օրինակ՝ մի անգամ դիզայները բրիտանացի երգչուհի Ադելի հասցեին ասել է, որ նա «չափազանց գեր է», բայց հետո հավելել, որ «նրա ձայնն աստվածային» է:

Երբ մի քանի տարի առաջ Փարիզի հյուրանոցներից մեկում կողոպտել էին ամերիկահայ հեռուստաաստղ Քիմ Քարդաշյանին՝ վերցնելով մի քանի միլիոն դոլարի զարդեղեն, Լագերֆելդն ասել էր, որ ամեն ինչի մեղավորը հենց Քարդաշյանն է: Դիզայների համոզմամբ՝ աստղը սխալ էր գործել՝ սոցցանցերում ի ցույց դնելով իր հարստությունը:

2011թ. արքայազն Ուիլյամի և Քեյթ Միդլթոնի պսակադրությունից հետո, դիզայները հարցազրույցներից մեկում խոսել էր հարսնաքրոջից՝ Պիպա Միդլթոնից՝ նշելով, որ չի հավանում վերջինիս դեմքը:

«Քեյթ Միդլթոնը գեղեցիկ կազմվածք ունի ու այդ տղայի համար ճիշտ ընտրված աղջիկ է: Ինձ դուր են գալիս այդպիսի կանայք՝ ռոմանտիկ գեղեցկուհիների նման: Բայց նույնը չեմ կարող ասել նրա քրոջ մասին: Ես չեմ հավանում նրա դեմքը: Նա պետք է իրեն միայն հետևից ցույց տա»,-ասել էր դիզայները:

Մի առիթով էլ նա վիրավորել էր երգչուհի Լանա Դել Ռեյին՝ հետաքրքրվելով, թե արդյոք աստղի մարմնի վրա որևէ բնական մաս կա:

Ռուսաստանի մասով էլ Լագերֆելդն ասել էր. «Եթե ծնվեի Ռուսաստանում ու կին լինեի, լեսբուհի կլինեի, քանի որ այնտեղ տղամարդիկ շատ տգեղ են:

Ընդամենը մի քանի գեղեցիկ տղամարդ կա, օրինակ՝ Նաոմի Քեմփբելի ընկերը (նկատի ունի մոդելի նախկին փեսացու Վլադիսլավ Դորոնինին): Ռուսաստանում կարելի է հանդիպել ամենագեղեցիկ կանանց ու ամենասարսափելի տղամարդկանց»:

Դիզայները նաև հայտարարել էր, որ ատում է զզվելի, տգեղ մարդկանց՝ հատկապես տգեղ, կարճահասակ տղամարդկանց:

Փոփ երգիչ Սիլի մասին էլ ասել է. «Ես մաշկաբան չեմ, բայց չէի ցանկանա նրա մաշկից ունենալ: Այն կարծես խառնարաններով պատված լինի»:

 Մի առիթով էլ Լագերֆելդն ասել էր, որ սպորտային հագուստ կրելը պարտության նշան է:

«Եթե կյանքիդ նկատմամբ վերահսկողությունը կորցրել ես, գնա ու մարզահագուստ գնիր»,-ասել է դիզայները:

 Աղբյուրը նկատում է, որ այն բացառիկ քչերից մեկը, որից Լագերֆելդը ներողություն է խնդրել, եղել է հոլիվուդյան դերասանուհի Մերիլ Սթրիփը:

Լագերֆելդը ներողություն էր խնդրել իր հայտարարության համար, ըստ որի՝ Սթրիփը հրաժարվել էր կրել դիզայների կողմից հատուկ իր համար կարված զգեստը, քանի որ ցանկացել էր, որ իրեն վճարեին դրա համար: