«Կոկորդիլոսներ՝ փողոցներում, իսկ կտուրներին՝ մարդիկ». անձրևի ռեկորդային տեղումներ Ավստրալիայում (լուսանկարներ)
Ավստրալիայի հյուսիսային հատվածում գտնվող Թաունսվիլ խոշոր քաղաքը շարունակում է գտնվել ռեկորդային առատության անձրևային տեղումների, դրա հետևանքով առաջացած ջրհեղեղների և մուսոնների տիրապետության տակ:
Ինչպես նշում է Daily Mail-ը, ստեղծված իրավիճակի հետևանքով փողոցներում կոկորդիլոսներ են հայտնվել, մինչդեռ ջրի բարձրացող մակարդակը բնակիչներին ստիպել է իրենց տների կտուրներ բարձրանալ:
Հուսահատ տեղաբնակները սոցցանցերում դիմում են անծանոթներին՝ նրանցից օգնություն խնդրելով:
«Խնդրում եմ օգնեք: Մենք արդեն մի քանի ժամ արգելափակված ենք տանը: Մեզ հետ վեցամյա երեխա ու շուն կա, որոնք լողալ չգիտեն»,-ասվում է հաղորդագրություններից մեկում:
Հեղեղումները շարունակվում են 6-րդ օրն ու խառնաշփոթ են առաջացրել տասնյակ հազարավոր մարդկանց կյանքում: Այժմ քաոսային իրավիճակն առավել բարդացրել է իշխանությունների նախազգուշացումը, համաձայն որի՝ առատ տեղումներն «ասպարեզ են բերել» կոկորդիլոսներին:
Իշխանությունները բնակիչներին խորհուրդ են տվել հեղեղված փողոցներով չանցնել, քանի որ կոկորդիլոսները կարող են ամենուր լինել:
Ըստ օդերևութաբանների՝ առաջիկա օրերին Թաունսվիլում պտտահողմ կլինի:
