Դադարեցվել է գիտության ֆինանսավորումը
Թուրքմենստանի նախագահ Կուրբանկուլի Բերդիմուհամմեդովը կարգադրել է դադարեցնել այդ երկրի Գիտությունների ազգային ակադեմիայի ֆինանսավորումը։ Ընդ որում, դադարեցումը լինելու է աստիճանաբար՝ երեք տարվա ընթացքում։ Այս մասին հայտնում է Total.kz-ն։ Նման կերպ կառավարությունը փորձում է միջոցներ խնայել տնտեսության համար, էներգետիկ ոլորտում նկատվող անկման ֆոնին։
Նոր որոշմամբ, ֆինանսավորումից կզրկվեն քսանվեց գիտահետազոտական ինստիտուտներ, ինչպես նաեւ Թուրքմենստանի սեյսմոլոգիայի ծառայությունը։ Ակադեմիայի կազմում են նաեւ բարձրագույն որակավորման խորհուրդը տասնյոթ բարձրագույն դպրոցներ, երկու բժշկական հետազոտական կենտրոններ, մեկ գրադարան եւ երկու հրատարակչություն։ Թուրքմենստանի Գիտությունների ակադեմիան հիմնադրվել է 1951 թվականին Աշխաբադում, որպես ԽՍՀՄ Գիտությունների ակադեմիայի թուրքմենական մասնաճյուղ։