Թատրոններ, պատկերասրահներ, ճոխ ռեստորաններ և 800 միլիոնանոց ներդրում. աշխարհի ամենամեծ զբոսանավը (լուսանկարներ)

Հարավային Կորեայի բնակիչ, նավերի նախագծող 36-ամյա Չունհուն Պարկը պատրաստվում է կառուցել աշխարհի ամենամեծ զբոսանավը, որի երկարությունը 229 մետր կլինի, գրում է Daily Mail-ը:

Եթե ծրագիրն իրագործվի, այս զբոսանավը չափերով կգերազանցի Արաբական Միացյալ Էմիրությունների նախագահ Խալիֆա բին Զայեդ ալ Նահյանին պատկանող, ներկայումս ամենամեծ Azzam մեգա զբոսանավին:

Valkyrie կոչվող ծրագրի շրջանակներում նախագծվող նավում կլինեն պատկերասրահներ, ռեստորաններ, առևտրի կենտրոններ, կազինո, թատրոններ և այլն, իսկ մի ամբողջ հարկաբաժին կհատկացվի սեփականատիրոջը:

Նախատեսվում է, որ նավը կկարողանա տեղավորել 52 ուղևոր և անձնակազմի 92 անդամ:

Նախագծի հեղինակ Պարկը ցանկանում է, որ զբոսանավը ոչ թե սեփականատիրոջ համար նախատեսված ճոխություն լինի, այլ հանրային զվարճանքների վայր, որը բաց կլինի բոլորի համար:

Պարկը, որը նախագծի վրա 8 ամիս է ծախսել, նավի արտաքին տեսքի համար մոխրագույնն է ընտրել, որպեսզի այն տարբերվի սովորական դարձած սպիտակ զբոսանավերից, որոնք, իր խոսքով, հարսանեկան տորթ են հիշեցնում:

Նախագիծը կյանքի կոչելու համար շուրջ 800 մլն դոլար կպահանջվի: Պարկի խոսքով՝ մի քանի հետաքրքիր առաջարկներ արդեն եղել են, սակայն դեռևս ոչ մի պայմանագիր չի կնքվել: