Ձեռնարկատեր Վահե Ստեփանյանի քրեական գործով զբաղվում է ՌԴ բիզնես օմբուդսմենը
Վորոնեժի մարզի խոշորագույն շինարարական ընկերություններից մեկի՝ մարզի դումայի պատգամավոր Ալեքսանդր Ցիբանի «Վիբոր» ընկերության բնակարանների հետ կապված խարդախության ռեզոնանսային գործը հայտնվել է ձեռներեցների իրավունքների հարցով օմբուդսմեն Բորիս Տիտովի տեսադաշտում: Գործով անցնող մեղադրյալներից մեկը՝ բիզնեսմեն Վահե Ստեփանյանն անցյալ տարի քննությունից թաքնվել էր հայրենի Հայաստանում, հեռակա կալանավորվել էր եւ նրա նկատմամբ միջազգային հետախուզում էր հայտարարվել, սակայն չէր դադարել իր անմեղությունն ապացուցել: Օմբուդսմենի թիմն օրերս նրան մտցրել է «Տիտովի ցուցակի մեջ», որի շնորհիվ Ստեփանյանն արդեն գարնանը կարող է Ռուսաստան վերադառնալ: Պաշտպանական կողմը հույս ունի, որ ձեռներեցը «Վիբորի» ղեկավարության հետ ընդհանուր լեզու կգտնի եւ «փոխզիջումային չափով» պարտքերը կմարի, հայտնում է «Կոմերսանտը»:
Վահե Ստեփանյանին, այսպես կոչված, «Տիտովի լոնդոնյան ցուցակի» մեջ (իրավապահ մարմիններից արտասահմանում թաքնվող անձանց ցուցակ, որոնք ցանկանում են Ռուսաստան վերադառնալ) մտցնելու մասին «Ъ-Չերնոզեմյեին»-ին պատմել է ՌԴ նախագահին առընթեր՝ արտահանձնման, արտաքսման, դաշնային եւ միջազգային հետախուզման ոլորտում ձեռներեցների իրավունքների պաշտպանի հանրային ներկայացուցիչ Դմիտրի Գրիգորիադին: Նրա խոսքով՝ Բորիս Տիտովի թիմը արդեն սկսել է այս գործով աշխատանքը. «Այն ընկալումը կա, որ Վահե Ստեփանյանը մեծ հավանականությամբ Ռուսաստան կգա չկալանավորվելու երաշխիքով»: Հիմա այս հարցը համաձայնեցվում է քննչական եւ հսկողության մարմինների հետ: «Վահե Ստեփանյանը լավագույն դեպքում կկարողանա Ռուսաստան գալ արդեն մարտին»,- հստակեցրել է Գրիգորիադին:
Վահե Ստեփանյանը «Ստեգրա Օյլ» ընկերության հիմնադիրն է, որը զբաղվում է էլեկտրավահանային սարքավորումների արտադրությամբ եւ տարածքների ներքին հարդարմամբ: «Վիբոր»-ի փոքր կապալներում նա սկսել է աշխատել 2013-ին, իսկ արդեն որոշ ժամանակ անց դարձել է նրա կոնտրգործակալը: Հաշվարկը հիմնականում կատարվել է բարտերային հիմքով՝ «Վիբոր»-ը որպես վճարում փոխանցում էր կառուցվող բնակարանների իրավունքները:
Քննության վարկածով՝ դրանից 1,5 տարի առաջ Վահե Ստեփանյանի մոտ «վստահության չարաշահման միջոցով օտար գույքի պահանջների իրավունքի ձեռքբերման միտք է ծագել», մասնավորապես՝ կառուցվող տներում բնակարանների: Այդ նպատակով նա ներգրավել է երկու հանցկացիների՝ զարմիկ Արթուր Ալավերդյանին եւ «Վիբոր»-ի աշխատակից Իննա Բորտնիկովային:
Արդյունքում մատակարարված էլեկտրական սարքավորւմների եւ հարդարման համար մատուցված ծառայությունների դիմաց «բարտերով վճարելու պատրվակով» մեղադրյալները «Վիբոր»-ի բարձրահարկերում 139 բնակարանների «պահանջի իրավունքին են տիրացել»: Քննությունը անշարժ գույքի ընդհանուր արժեքը 304 մլն ռուբլի է գնահատել, մի շարք կիսակառույց բնակարաններ որպես նյութական ապացույց այժմ կալաքնի տակ են: Գործի հարուցումից անմիջապես հետո Արթուր Ալավերդյանը տնային կալաքի է ենթարկվել, իսկ Իննա Բորտնիկովան՝ ստորագրությամբ երկրից չհեռանալու պայմանի: Ստեփանյանին աշնանը հեռակա կարգով կալանավորել էին եւ նրա նկատմամբ միջազգային հետախուզում հայտարարել: