Հայը Վոլոգդայում Էյֆելյան աշտարակի և այլ հայտնի կառույցների կրկնօրինակներն է կանգնեցրել (լուսանկար)
ՌԴ Վոլոգդայի մարզի նույնանուն քաղաքում բնակվող, շինարարական ընկերության սեփականատեր, ազգությամբ հայ Ատոմ Գրիգորյանը քաղաքից 60 կմ հեռավորության վրա վարձած հողատարածքում հայտնի աշտարակների փոքր տարբերակներն է կանգնեցրել, գրում է «Наша Вологда» պարբերականը:
Նման հուշարձաններ կառուցելու միտքը Գրիգորյանի մոտ առաջացել է մի քանի տարի առաջ, երբ իր տան բակում փոքրիկ Արարատ լեռ է «կանգնեցրել»՝ հայրենիքի կարոտը մեղմելու համար:
Ավելի ուշ ձեռնարկատերը հողակտոր է վարձակալել և այնտեղ կանգնեցրել Փարիզի խորհրդանիշի՝ 18,5 մետրանոց կրկնօրինակը:
«Կինս աջակցում էր ինձ: Շինարարության ավարտից հետո մենք երբեմն աշտարակի տակ համբուրվել ու լուսանկարվել ենք»,- ասել է նա:
Շուտով Գրիգորյանը կանգնեցրել է նաև Պիզայի աշտարակի 7 մետրանոց և «Օստանկինո» հեռուստաաշտարակի 20 մետրանոց տարբերակները:
Գրիգորյանը պատրաստվում է հետագայում տարածքը լցնել աշխարհի հայտնի հուշարձաններով՝ ներառյալ անգլիական Բիգ Բենով և Դուբայում գտնվող աշխարհի ամենաբարձր՝ Բուրջ Խալիֆա երկնաքերով, որից հետո այնտեղ հանգստի գոտի կբացի՝ պուրակով ու հյուրանոցով:
Գրիգորյանը պատմել է պարբերականին, որ Հայաստանը լքել է 1993 թ.-ին՝ աշխատանք չգտնելու պատճառով, սակայն շատ է կարոտում հայրենիքը:
