Թուրքիայում զբոսաշրջիկը, 40 հազար դոլար արժողությամբ ադամանդե մատանին տեսնելով, «տրանսի մեջ է ընկել» և կուլ տվել այն

Անցած տարվա հոկտեմբերին Թուրքիայում ճամփորդող իռլանդացի Յան Քեմփբելը թանկարժեք զարդերի խանութում 40 հազար դոլար արժողությամբ ադամանդե մատանի է կուլ տվել, իսկ հետագայում ոստիկանությանը խոստովանել է, թե իբր գեղեցիկ ադամանդի տեսքից տրանսի մեջ է ընկել և անգիտակցաբար այն կուլ տվել, գրում է Oddity Central-ը:

Ականատեսների համաձայն՝ Քեմփբելը, հուսահատության մատնվելով, կուլ է տվել ադամանդը, քանի որ վախեցել է գողության համար հետապնդվելուց:

Ոստիկանները նրան բռնել և տեղափոխել են հիվանդանոց, որտեղ փորձել են արհեստական փսխման միջոցով ետ ստանալ 2,5 կարատանոց ադամանդե մատանին, սակայն բոլոր ջանքերն ապարդյուն են անցել, քանի որ, ըստ բժիշկների, այն մնացել է տղամարդու ստամոքսի մի անկյունում:

Երկու օր շարունակ բոլոր հնարավոր միջոցներին դիմելուց հետո, 54-ամյա տղամարդուն վիրահատել են:

«Երբ տեսա ադամանդները, տրանսի մեջ ընկա: Վաճառողն ինչ-որ բան էր ասում, սակայն ես նրան անգամ չէի էլ լսում, իսկ երբ գիտակցության եկա և գրպանումս տեսա փոքրիկ մատանին, խուճապից այն կուլ տվեցի՝ վախենալով հետապնդումից»,-ասել է Քեմփբելն իր վկայության մեջ:

Տղամարդը փորձել է իր տարօրինակ արարքը պատճառաբանել նաև կնոջ ողբերգական մահով, որից հետո նրա ամուսնական մատանին կորել էր, և ամեն անգամ, երբ ինքն ադամանդե մատանի է տեսնում, այն վերցնելու ցանկություն է ունենում:

Ոստիկանները հավատ չեն ընծայել Քեմփբելի արդարացումներին, և նրա դեմ քրեական գործ է հարուցվել: