«Դա այնքան բարդ է». Քեմբրիջի դքսուհին պատմել է ծնող լինելու դժվարությունների մասին (լուսանկարներ)

Քեմբրիջի դքսուհի Քեյթ Միդլթոնը, որը երեք երեխայի մայր է, անկեղծացել է՝ պատմելով ծնող լինելու դժվարությունների մասին:

Ինչպես նշում է Daily Mail-ը, ծնողներին երեխաների խնամքի հարցում օգնող կամավորների հետ հանդիպման ժամանակ 37-ամյա դքսուհին պատմել է, որ թեև տանն իրենց հետ բնակվող դայակ ունի, սակայն եղել են պահեր, երբ իրեն մեկուսացած է զգացել:

«Դա այնքան բարդ է: Երբ երեխան ծնվում է, սկզբից բոլորը փորձում են օգնել, սակայն մեկ տարեկանից հետո դա այլևս այդպես չէ: Բոլորի մոտ էլ նույն խնդիրն առաջանում է»,-նշել է դքսուհին:

Միևնույն ժամանակ թագավորական ընտանիքի անդամը խոստովանել է, որ մայրությունը հրաշալի փորձառություն է ու մեծ պարգև:

«Բայցևայնպես, երբեմն դա ահռելի մարտահրավեր է նույնիսկ ինձ պես մեկի համար, որը տանն օգնող ունի, մինչդեռ մայրերից շատերը նման հնարավորություն չունեն: Շատ մայրեր, այդ թվում՝ ես, կարող են ինքնավստահության պակաս ունենալ ու կասկածել իրենց գիտելիքների վրա»,-ասել է արքայազն Ուիլյամի կինը:

Հետաքրքրական է, որ հանդիպման մասնակիցները շատ տպավորված են եղել այդ հարցի վերաբերյալ Միդլթոնի ունեցած փորձառությամբ ու hասկացողությամբ:

Արքայազն Ուիլյամն ու Քեյթ Միդլթոնն ամուսնացել են 2011թ. և ունեն երեք երեխա: