Աշխարհում միլիարդատերերի թիվը 10 տարում գրեթե կրկնապատկվել է

Վերջին 10 տարում միլիարդատերերի թիվը գրեթե կրկնապատկվել է՝ 2018 թվականի դրությամբ հասնելով 2208-ի։ Իսկ նրանց կարողությունն օրական աճել է 2․5 մլրդ դոլարով։ Այս մասին է վկայում միջազգային բարեգործական և մարդասիրական Oxfam կազմակերպության հետազոտությունը, որը պատրաստվել է Դավոսում կայանալիք համաշխարհային տնտեսական համաժողովի նախօրեին, փոխանցում է RIA Novosti-ն։

Կազմակերպության տվյալներով՝ այդ խմբի կարողության աճը մեկ տարում կազմել է 900 մլրդ դոլար։ 2017-18 թթ․ յուրաքանչյուր 2 օրը մեկ աշխարհում նոր միլիարդատեր է հայտնվել։

Միաժամանակ Oxfam-ն արձանագրել է տագնապալի միտում․ աշխարհի 3․8 մլրդ աղքատների ֆինանսական վիճակն անցած տարի ամենևին չի բարելավվել։ Կազմակերպության հաղորդմամբ՝ աշխարհի ամենահարուստ 26 մարդկանց ունեցվածքը հավասարազոր է 3․8 մլրդ աղքատների ընդհանուր կարողությանը։

Հետազոտության մեջ նշվում է, որ աշխարհի ամենահարուստ մարդու՝ Amazon ընկերության սեփականատեր Ջեֆ Բեզոսի կարողոթյունը հասել է 112 մլրդ դոլարի, և այժմ նրա կարողության ընդամենը 1 տոկոսը հավասար է 105 մլն բնակչություն ունեցող Եթովպիայի առողջապահության բյուջեին։