Սոցցանցում հրապարակված մեկ լուսանկարը փոխել է մի ամբողջ ընտանիքի կյանքը

CNN-ի լրագրող Լիիթ Մարկուսը Twitter-ում տեղադրել է մի տղամարդու լուսանկար, որը օգնել է նրան երիկամ գտնելու իր կնոջ համար։ Լուսանկարը վիրուսային է դարձել, ընտանիքին ցանկացել են օգնել մի շարք հայտնիներ։

Լրագրողուհին դեկտեմբերի վերջին է տեղադրել լուսանկարը և գրել․ «Ահա լուսանկարը, որ ես արել եմ երեկ Target խանութում, ես չեմ կարողանում ազատվել այս մտքից»։ Լուսանկարում տղամարդը կանգնած է՝ մեջքին ուսապարկ, որին հայտարարություն է փակցված․ «Կնոջս երիկամ է պետք B+» և հեռախոսահամար։

Մի քանի ժամ անց լուսանկարը հազարավոր կիսումներ է գրանցել։ Այն կիսել են շատ հայտնիներ՝ դերասաններ Զաք Բրաֆը և Էվան Ռեյչել Վուդը, թենիսիստուհի Մարթինա Նավրատիլովան, դերասանուհի Սառա Հայլենդը, որ վերջերս է երիկամի փոխպատվաստման վիրահատություն տարել։

Բրուքլինի բնակիչ Ռեյմոնդ Թոմփսոնը զարմացել է, երբ անծանոթ մարդիկ սկսել են զանգել իրեն։ Այն մասին, որ լուսանկարը վիրուսային է դարձել, նա տեղեկացել է զանգահարողներից, քանի որ ինքը գրանցված չէ Twitter-ում։

Երիկամը գտնվել է, բժշկական բոլոր ծախսերը կծածկի բժշկական ապահովագրությունը։