Արքայազն Հարին մտադիր է իր ընկերուհուն ծանոթացնել թագուհու հետ
Արքայազն Հարին մտադիր է իր ընկերուհուն՝ դերասանուհի Մեգան Մարքլին բերել պալատ եւ ծանոթացնել Մեծ Բրիտանիայի թագուհի Ելիզավետա II-ի հետ՝ Մայրերի տոնին։ Այս տարի տոնը ընկնում է մարտի 26–ին։
Արքայազնի մտերիմները չեն կասկածում նրա մտադրությունների լրջությանը։ Ավելին, արդեն լուրեր են տարածվել, որ զույգը հնարավոր է ամուսնանա այս ամռանը։
Ավելի վաղ «Ֆորս–մաժորներ» հեռուստասերիալի աստղը արդեն ներկայացվել էր արքայազն Վիլյամի տիկնոջը՝ Քեյթ Միդլթոնին։ Հարիի ընկերուհու եւ Քեմբրիջյան դքսուհու հանդիպումը բարեհաջող էր անցել։
Այժմ արքայազնը մտադիր է իր սիրելիին ներկայացնել նաեւ թագավորական ընտանիքի մյուս անդամներին։
Ավելացնենք, որ 2017 թվականի գարնանը թագավորական ընտանիքում եւս մեկ տոնախմբություն է նախատեսվում։ Ամուսնանում է Քեյթի քույրը՝ Փիփա Միդլթոնը։ Նշանակալի է, որ օրիորդը պայման է դրել, որ իր հարսանիքին պետք է ներկա գտնվեն միայն ամուսնացած զույգեր, որպեսզի ոչ մի ազատ աղջիկ չշեղի հյուրերի ուշադրությունը։