ԱՄՆ ռազմածովային ուժերի ութ սպաներ ռազմական գաղտնիքներ են հայտնել՝ փոխարենը ստանալով սեքս–երեկույթներ
ԱՄՆ ՌԾՈՒ պաշտոնաթող ադմիրալ Բրյուս Լավլեսը, ինչպես նաեւ Յոթերորդ նավատորմի հրամանատար Դեվիդ Նյուլանդը եւ եւս յոթ բարձրաստիճան զինվորականներ մեղադրվում են արտասահմանյան գործակալին ռազմական գաղտնիքներ հայտնելու մեջ՝ փոխարենը ստանալով մարմնավաճառների հետ սեքս երեկույթներ, ճոխ ընթրիքներ եւ շքեղ արտասահմանյան ճամփորդություններ։
Այս մասին երեքշաբթի օրը հայտնել է ԱՄՆ արդարադատության նախարարությունը, որը նոր գործող անձանց էր ի հայտ բերել` «գեր Լեոնարդի» աղմուկ հանած կոռուպցիոն գործի շրջանակներում։
Համաձայն գերատեսչության կողմից շարադրված փաստերի, նշված «անձինք գործել են համատեղ՝ ի օգուտ Glenn Defence Marine Asia սինգապուրյան ֆիրմայի սեփականատեր Լեոնարդ Գլեն Ֆրենսիսի»։ Ըստ նախարարության տվյալների՝ Ֆրենսիսը վերջիններիս համար թանկարժեք ճաշկերույթներ է կազմակերպել, «2 հազար դոլար արժողությամբ սիգարների հավաքածուներ է գնել, ինչպես նաեւ նրանց համար սեքս–երեկույթներ է կազմակերպել թանկարժեք հյուրանոցներում»։
Արդարադատության նախարարությունը հաղորդել է, որ մեղադրյալների ձերբակալությունը տեղի է ունեցել Կալիֆորնիա, Տեխաս, Ֆլորիդա, Կոլորադո եւ Վիրջինիա նահանգներում։ Մեղադրանքի մի քանի կետերի համաձայն նրանց կարող է սպառնալ մինչեւ քսան տարի ազատազրկում։ Ադմիրալ Լավլեսը «ներկայումս գտնվում է տնային կալանքի տակ Կոլորադոյում եւ այսօր պետք է ժամանանի Սան–Դիեգոյի դատարան»։
Glenn Defence Marine Asia–ն քառորդ դար զբաղվել է ասիական նավահանգիստներում ամերիկյան նավերի ափային սպասարկումով։ Սակայն 2013 թվականին ԱՄՆ իշխանությունների մոտ հարցեր ծագեցին այս կազմակերպության ղեկավարության նկատմամբ։
Հետաքննության ընթացքում պարզվեց, որ Ֆրենսիսը, օգտվելով նավատորմի հրամանատարության շրջանում իր կապերով, իմացել է ռազմական նավերի եւ ԱՄՆ սուզանավերի տեղաշարժերի մասին։ Ավելին, նրա հանցակիցները, որոնց թվում էին նաեւ ադմիրալներ, օգնել են փոխել նավերի ուղղությունը` դեպի իր հսկողության տակ գտնվող նավահանգիստներ։
Բացի այդ «Defence Marine Asia»–ում կեղծվել են ապրանքագրերը, կեղծվել են գները եւ գործել է «օտկատների» մեխանիզմ։
2013 թվականի սեպտեմբերին ԱՄՆ հատուկ ծառայություններին ԱՄՆ–ում հաջողվել է ձերբակալել «gեր Լեոնարդին», նրան դատապարտել են խարդախության համար։