Իսպանիայի իշխանությունները մտադիր են դատի տալ Շակիրային

Բարսելոնայի դատախազությունը դատական հայց կներկայացնի կոլումբացի հայտնի երգչուհի Շակիրայի դեմ, որին կասկածում է հարկերից խուսափելու համար, հայտնում է РИА Новости-ն՝ հղում անելով El Pais թերթին։

Հաղորդվում է, որ հարկային ծառայությունն ավարտին է հասցրել հետաքննությունը, որի արդյունքում պարզվել է, որ 2012-2014 թվականներն ընկած ժամանակահատվածում երգչուհին Իսպանիայում չի վճարել եկամտահարկն ու գույքահարկը: Ընդհանուր առմամբ՝ նա պետությանը պարտք է 14.5 միլիոն եվրո:

Դատախազությունը մերժել է փաստաբանների բոլոր փաստարկներն ու տեղեկացրել, որ մոտ ժամանակներում պատրաստվում է դատական հայց ներկայացնել:

2017 թվականին հարկային ծառայությունը սկսել է կասկածել, որ երգչուհին 4 տարի շարունակ (2011-2014թթ.) խուսափել է հարկերից՝ չնայած, որ մեծ մասամբ բնակվել է Իսպանիայում: Շակիրայի ներկայացուցիչները պնդում էին, որ երգչուհին Իսպանիայում է լինում տարեկան առավելագույնը 183 օր, ուստի օրենքի համաձայն հարկատու չէ: Հարկային մարմիններն իրենց հերթին պնդում էին, որ Շակիրան պետք է զեկուց ներկայացնի իր եկամտի վերաբերյալ՝ անկախ նրանից, թե որտեղից է այն ստացել:

2018 թվականի փետրվարին երգչուհին 20 միլիոն եվրո է վճարել 2011 թվականի պարտքերի մարման համար, սակայն նա պնդում է, որ միշտ կատարել է իր պարտավորությունները և չի խուսափել հարկերից: Նրա խոսքով՝ մարված է, ոչ միայն 2011 թվականի պարտքը, այլև 2012, 2013 և 2014 թվականների պարտքը, որը նա վերջերս է մարել՝ վճարելով 14.5 միլիոն եվրո: