Թրամփի մամլո քարտուղարը Apple Store-ում վեճի է բռնվել գնորդուհու հետ
Սպիտակ տան մամլո քարտուղար Շոն Սփայսերը գնորդի հետ վեճի է բռնվել Վաշինգտոնի Apple Store վաճառասրահում,– գրում է New York Daily News-ը։
Շրի Չաուխանը՝ 33 ամյա հնդկուհի, իր հանդիպումը Սփայսերի հետ տեսագրել է հեռախոսի վրա։ Հաղորդվում է, որ Սփայսերին տեսնելով դրամարկղի մոտ, կինը փորձել է նրան մի քանի հարց տալ, որոնք նա արհամարհել է։
Տեսագրությունում Չաուհանը հարցնում է Սփայսերին՝ ի՞նչ է նա զգում «աշխատելով ֆաշիստի մոտ», «արդյո՞ք նա օգնել է ռուսներին» եւ «արդյո՞ք նա նույնպես հանցագործ է»։
Ի պատասխան Սփայսերը հայտարարել է. «Սա այնքան հզոր երկիր է, որ թույլ է տալիս ձեզ մնալ այստեղ»։
Ավելի ուշ, տեսագրության հրապարակումից հետո, կինը խոստովանել է, որ այնքան էլ հարգալից չի եղել մամլո քարտուղարի հետ, սակայն նրա մեկնաբանությունը՝ կապված երկրում իր մնալու հետ, ցնցել է իրեն։
Սպիտակ տունը որևէ կերպ չի մեկնաբանել իրավիճակը։