Գալկինի և Տիմատիի հայ վարսահարդարը լավագույններից մեկն է Ռուսաստանում

Ռուսաստանում ամենահայտնի սափրող, վարսահարդար-ոճաբաններից մեկը համարվում է Անդրանիկ Ստեփանյանը: Նա Նիդերլանդներից է և վերջին 4 տարում ռուսական շոու-բիզնեսի ամենահայտնի դեմքերի վարսահարդարն է համարվում: Նրան ուղղակի Անդո են ասում:

Իր առաջին քայլերը հայազգի ոճաբանը սկսել է դեռ Երևանում, 17 տարեկանում: Զբաղմունքը սկզբում սիրողական էր: Հասարակ մկրատով կտրում-հարդարում էր ընկերների մազերը: Իսկ Նիդերլանդներ տեղափոխվելուց հետո սիրողական զբաղմունքը նրա համար դարձավ լուրջ մասնագիտություն: 2014-ին Անդրանիկը տեղափոխվեց Մոսկվա: Պատճառն այն աղջիկն էր, որին սիրում էր Անդրանիկը, և որը հետագայում դարձավ նրա կինը:

Այսօր Անդրանիկն ամենաթանկ վարձատրվող ոճաբաններից մեկն է: Նրա մոտ ամենահասարակ վարսահարդարումն արժե 3 000 ռուբլի: Նա ունի մի քանի հարյուր մշտական հաճախորդ, որոնց գերակշիռ մասը հայտնի երգիչներ ու դերասաններ են: Նրանց թվում է Տիմատին, L’One-ը, Եգոր Կրիդը, Մոտը, Մաքսիմ Գալկինը, Մոսկվայի «Սպարտակ»-ի ֆուտբոլիստ, հոլանդացի Քվինսի Պրոմես: