Մեր հույսը ՀԴՄ կտրոններն են. վատ եւ նեգատիվ արարքների մասին

ՀԴՄ չխփելը պետք է դիտարկվի շատ կոնկրետ նեգատիվ արարք ոչ միայն վաճառողի, այլեւ գնորդի կողմից: Այս մասին, այսօր՝ նոյեմբերի 13-ին, ԱԺ-ում 2019 թվականի բյուջեի նախագծի քննարկման ժամանակ նշեց վարչապետի պաշտոնակատար Նիկոլ Փաշինյանը:

«Երկրում կա այն կանխավարկածը, որ այ տեսեք, թալանում են, էսքան կոռուպցիա կա, բա ինչի՞ իրենց կարելի է անել, մեզ չի կարելի մեր հազար կամ 5 հազար դրամն առնել: Հիմա չկա այդ ամեն ինչը, եւ եթե որոշ տեղերում կա, մենաշնորհներ չկան: Եթե դեռ որոշ երեւույթներ կան, նշանակում է դեռ չենք տեղորոշել, որ պահին տեղորոշենք, կոչնչացնենք: Արդարությունը բոլորին է վերաբերում: Եթե այն վերաբերում է բոլորին, բայց ոչ մեզ, դա դադարում է լինել արդարություն»,-ասաց նա:

Փաշինյանը նկատեց, որ եթե հարկվող գույքի ընդամենը մեկ տոկոսը հարկենք այլ տրամաբանությամբ, արդյունքում գույքահարկի չափը կկրկնապատկվի. Խոսքը էլիտար շինությունների, շենքերի, տների մասին է:

Վարչապետի պաշտոնակատարը խոսեց նաեւ Հայաստանում հարկեր/ՀՆԱ հարաբերակցության մասին. «Հայաստանում հարկեր/ՀՆԱ հարաբերակցությունը 2018 թվականին նախատեսվում է 20,3 տոկոս, մինչդեռ Վրաստանում այն 26 տոկոս է: Մենք պետք է այս ցուցանիշը էականորեն բարելավենք եւ ստվերային տնտեսության դեմ պայքարենք»,-ասաց նա:

Լուրեր Հայաստանից - NEWS.am