Ձկնորսը հաջողակ պերկես է բռնել և 10 հազար դոլար է շահել

Ավստրալիական Դարվին քաղաքից ձկնորս Բեզիլ Տե Ահոն, չի նկատել, որ իր կարթով այնպիսի ձուկ է բռնել, որի համար կարող էր 10 հազար ավստրալիական դոլար ստանալ։ Այս մասին հաղորդում է ABC News-ը։

Ձկնորսը ծովային պերկեսին բռնել էր դեռևս հոկտեմբերի սկզբին։ Ձուկը երկու շաբաթ սառնարանում է եղել։ Միայն երբ նա որոշել է այն եփել, նկատել է «2019 մարտի 31» կարմիր նշումը նրա վրա։

Նա հասկացել է, որ սա վիճակախաղի ձկներից մեկն է, որոնց բաց են թողնում Ավստրալիայի հյուսիսային մասի գետերում՝ զբոսաշրջության գովազդի համար։ Եթե դրանցից մեկը բռնես նախքան նշված ժամկետի ավարտը, կարելի է մեծ դրամական շահում ակնկալել։

Կազմակերպիչներին զանգելուց հետո ձկնորսը պարզել է, որ 10 հազար ավստրալիական դոլար է շահել։