Կիրկորովն ու Բասկովը ներողություն են խնդրել Ibiza սկանդալային տեսահոլովակի համար (տեսանյութ)

Ռուսաստանի Դաշնության վաստակավոր արտիստներ Ֆիլիպ Կիրկորովն ու Նիկոլայ Բասկովն իրենց երկրպագուներից ներողություն են խնդրել վերջերս համացանցում հայտնված Ibiza տեսահոլովակի համար: Նրանք նոր կարճ հոլովակ են նկարահանել հայտնի ռեփերներ Լիլ Փամփի ու Քանյե Ուեսթի I Love It տեսահոլովակի հիման վրա ու դրա միջոցով դիմել են հիասթափված երկրպագուներին, գրում է Lenta կայքը։

Արտիստները նշել են, որ Ibiza տեսահոլովակի միջոցով պարզապես ցանկացել են կատակել և չեն ուզում կորցնել իրենց երկրպագուներին։

Բասկովը խնդրել է ներել իրենց՝ «բթամիտ» արտիստներին, նրա համար, որ իրենք անգիտակցաբար խաղացել են որոշ մարդկանց զգացմունքների հետ։

Ներողություն է խնդրել նաև Կիրկորովը։ Նա նշել է, որ «Իբիցան» շատ նման է իր նախորդ հիթերից մեկին, սակայն այս անգամ, ըստ նրա, նա չափն անցել է «ինքնակրկնօրինակման» գործում։