Հրապարակվել է 2018թ. ամենաբարձր վարձատրվող դերասանների ցանկն՝ ըստ Forbes-ի

Ամերիկյան Forbes ամսագիրը հրապարակել է այս տարվա ամենաբարձր վարձատրվող դերասանների վարկանշային աղյուսակը, որը գլխավորում է ամերիկացի դերասան Ջորջ Քլունին:

Նշվում է, որ դերասանական գործունեությունից բացի Քլունին զգալի գումար է վաստակել նաև իր Casamigos Tequila ընկերության վաճառքից: Գործարքի շնորհիվ դերասանի տարեկան եկամուտը կազմել է 233 միլիոն դոլար:

Վարկանշային աղյուսակի երկրորդ հորիզոնականում է հայտնվել Դուեյն Ջոնսոնը, ով 2018-ին վաստակել է 124 մլն դոլար: Երրորդ հորիզոնականում է Ռոբերտ Դաունի կրտսերը՝ վաստակած 81 մլն դոլարով, ում համար այս տարի առավել եկամտաբեր է եղել «Վրիժառուները. Անվերջության պատերազմ» ֆիլմում կատարած դերը:

Առաջատար տասնյակում են հայտնվել Քրիս Հեմսվորթը (64.5 մլն դոլար), Ջեքի Չանը (45.5 մլն դոլար), Ուիլ Սմիթը (42 մլն դոլար), Ակշայ Կումարը (40.5 մլն դոլար), Ադամ Սենդլերը (39.5 մլն դոլար), Սալման Խանը (38.5 մլն դոլար) և Քրիս Էվանսը (34 մլն դոլար):

 Հիշեցնենք, որ ավելի վաղ ամսագիրը հրապարակել էր նաև 2018-ի ամենաբարձր վարձատրվող դերասանուհիների վարկանշային աղյուսակը, որը գլխավորել է ամերիկացի դերասանուհի Սքարլեթ Յոհանսոնը: