ՀՀԿ-ականների տարօրինակ հարցերը եւ հասարակության արձագանքը

Այսօր խորհրդարանում ՀՀԿ-ականները հարցեր էին ուղղում Նիկոլ Փաշինյանին: Ինչպես կասեր Ռուբեն Հախվերդյանը՝ հարցեր տարօրինակ, հարցեր թարս ու շիտակ: Եթե հարցուպատասխանին հետեւեր հայաստանյան իրականությունից հեռու մի մարդ, ապա նրա մոտ տպավորություն կստեղծվեր, որ ՀՀԿ-ն ընդդիմադիր խմբակցություն է, իսկ Նիկոլն էլ տասը տարի ղեկավարել է Հայաստանը:

Հարցուպատասխանին հետեւելուց հետո նրանք, ովքեր այնքան էլ ոգեւորված չէին Նիկոլ Փաշինյանի վարչապետության հեռանկարով կամ ինչ-ինչ պատճառներով կարծում էին, որ մինչ արտահերթ ընտրությունները նա չպետք է ղեկավարեր կառավարությունը, ավելի համոզվեցին, որ րոպե առաջ ՀՀԿ-ն պետք է հեռանա կառավարման ղեկից:

ՀՀԿ-ն թողեց տխուր, շատ տխուր տպավորություն: Նրանք, ովքեր պատասխանատու են երկրի այս վիճակի համար, այնպիսի կեցվածք էին ընդունել, կարծես մեղավորը բոլորն են, բայց ոչ իրենք: Փոխանակ առիթն օգտագործեին եւ ժողովրդից ներողություն խնդրեին, իրենց պահեցին այնպես, որ նույնիսկ ամենաչեզոքներն ու անտարբերներն անցան հեղափոխականների կողմը:

Մենք հարցուպատասխանի ժամանակ մեկ անգամ եւս համոզվեցինք, որ այս թիմը, որի անունը ՀՀԿ է, իրեն ամբողջովին սպառել է եւ ամբողջովին կորցրել իրականության զգացումը: Իրոք, ՀՀԿ-ն պետք է հեռանա եւ այստեղ երկու կարծիք այլեւս չի կարող լինել:

ՀՀԿ-ն վերածվել էր աղբյուրի վրա նստած հրեշի, որի հեռանալուց հետո վերջապես երկրի այգիներն ու բանջարանոցները կկանաչեն: Մինչ այսօրվա հարցուպատասխանը, եթե կային մարդիկ որ կասկածում էին, ապա հիմա արդեն կասկածողներ չեն մնացել կամ գրեթե չեն մնացել:

Եւ հիմա ամենակարեւորն այն է, որ ՀՀԿ-ն հեռանա անաղմուկ, անցնցում եւ հոժարակամ, օրինակ վերցնելով կուսակցության ղեկավարից:

Հակոբ Ասատրյան 

Top-News.am

Այս թեմայով Արամ Աբրահամյան. Արագ ընտրեք Նիկոլ Փաշինյանին վարչապետ Նիկոլ փաշինյանի հանդիպումը ՀՀԿ խմբակցության հետ (Տեսանյութ) Սա Մայդան չէ. NTV-ի անդրադարձը հայաստանյան իրադարձություններին (Տեսանյութ) Նիկոլ Փաշինյանը ՌԴ պատվիրակության հետ քննարկել է ՀԱՊԿ-ի եւ ԵԱՏՄ-ի հարցերը Նիկոլ Փաշինյանը պատրաստակամ է հանդիպել է ՌԴ Պետդումայի պատգամավորներին