ՀԾԿՀ-ն 5 մլն դրամով կտուգանի «Վեոլիա Ջուր» ընկերությանը՝ քաղաքացիներին մերժելու համար

ՀՀ Հանրային ծառայությունները կարգավորող հանձնաժողովի ապրիլի 4-ին տեղի ունենալիք նիստի օրակարգում ընդգրկված նախագծերից մեկով նախատեսվում է «Վեոլիա Ջուր» ընկերությանը տուգանել 5 միլիոն դրամով։

Տուգանելու հիմքը երկու բնակիչների բողոքներն են, որոնք դիմել են «Վեոլիա ջուր» ընկերությանը, որ իրենց տան համակարգը միացնեն ընկերության ջրամատակարարման և ջրահեռացման համակարգին, սակայն մերժվել են:

Մի դեպքում դիմողը Արմավիրի մարզի Փաևրաքար համայնքի բնակիչ Նիկոլայ Հարությունյանն է, մյուս դեպքում նույն մարզի Այգեկ գյուղի բնակիչ Արզուման Հարությունյանը:

Առաջին դեպքում քաղաքացին «Վեոլիա ջուր»-ին դիմել է 2017 թվականի մարտի 31-ին, որից հետո 8 ամիս անց միայն ընկերությունը պատասխանել է եւ իր մերժումը հիմնավորել նշված հասցեում ապօրինի ջրամիացման առկայության հետ:

Երկրորդ դեպքում, քաղաքացին «Վեոլիա ջուր»-ին դիմել է այս տարվա հունվարի 9-ին, սակայն սահմանված ժամկետում տեխնիկական պայմաններ չի ստացել, որի առնչությամբ ընկերության կողմից ստացել է բանավոր պատասխան, որ դիմումը ընկերության աշխատակցի անփութության պատճառով չի մուտքագրվել և պետք է սպասել:

Լուրեր Հայաստանից - NEWS.am