Նաիրա Զոհրաբյանն ընդդեմ ռեյտինգային ընտրակարգի

ԱԺ պետական-իրավական եւ մարդու իրավունքների պաշտպանության հարցերի մշտական հանձնաժողովում երեկ գրեթե աննկատ քննարկման ներկայացվեց «ՀՀ ընտրական օրենսգրքում» փոփոխություններ կատարելու մասին» հարցը:

Աննկատ, քանի որ այսօր փորձ է արվում հանրությանը համոզել, որ ավելի կարեւոր է այն հարցը, թե Վազգեն Սարգսյանն ապտակել է Արմեն Սարգսյանին 96-ին, թե ոչ, քան գործող ընտրական համակարգի թերությունների վերացումը:

Իսկ «ՀՀ ընտրական օրենսգրքում» փոփոխություններ կատարելու մասին» առաջարկի հեղինակներն են «Ծառուկյան» խմբակցության պատգամավորներ Նաիրա Զոհրաբյանը, Միքայել Մելքումյանը, Վահե Էնֆիաջյանը:

Քննարկման ժամանակ Նաիրա Զոհրաբյանը շատ դիպուկ շեշտել է, որ իրենց առաջարկը մեկն է՝ վարկանշային, այլ կերպ ասած՝ ռեյտինգային ընտրակարգից անցում կատարել 100%-անոց պարզ, համամասնական ընտրակարգի:

«Առաջարկն անում ենք՝ հաշվի առնելով 2017թ-ի ապրիլի 2-ի ընտրությունները, որոնք, ըստ էության, չունեին քաղաքական բովանդակություն, մենք գտնում ենք, որ դրա պատճառը ռեյտինգային ընտրակարգն է: Առաջարկում ենք ընտրություններն անցկացնել պարզ, 100%-անոց համամասնական ընտրակարգի միջոցով, կուսակցության կամ դաշինքի մեկ ընդհանուր ցուցակով»,- ասել է նա:

Այնպիսի փուլում ենք, այնպիսի ժամանակներում, որ անգամ զարմանում ես, որ գտնվում են պատգամավորներ, որոնք չեն հոգնում խոսել առկա խնդիրների մասին եւ դեռ փորձում են պայքարել ակնհայտ սխալները վերացնելու համար: Նաիրա Զոհրաբյանը հենց այդպիսինն է: Դժվար է չհամաձայնել նրա հետ, որ ապրիլի 2-ի ընտրությունները բավական էին, որ արդեն իսկ հաջորդ օրը ընտրական օրենսգրքից հանվեր ռեյտինգային ընտրակարգի մասին հիշատակումը:

Իսկապես, ռեյտինգային կամ վարկանշային ընտրակարգը ընտրությունները զրկում է քաղաքական բովանդակությունից, իսկ եթե հաշվի առնենք, որ այս ընտրություններն արդեն միակ համապետական ընտրություններն են, ապա հարցն էլ ավելի է կարեւորվում:

Նաիրա Զոհրաբյանը համարում է, որ կառավարության ներկայացրած հիմնավորումը լուրջ չէ: «Այն հիշեցնում է տուրիստական «պուտեվոդիտել» ընդամենը, թե ինչպիսի ընտրական մոդելներ կան,եւ վերջում էլ Եվրիպիդեսյան եզրահանգումներ են արվել, թե գլոբալ լավագույն մոդել, որ կարելի է կիրառել որեւէ երկրում, գոյություն չունի»,- ասել է նա: 

Նաիրա Զոհրաբյանը ճիշտ է, երբ պնդում է, թե որեւէ մեկը չի կարող վիճարկել, որ ընտրական օրենսգրքում խնդիր կա: Իսկ մենք էլ ավելացնենք, որ ոչ թե խնդիր կա, այլ շատ լուրջ խնդիր՝ հիմնահարց, առանց որի լուծման մեր երկրում առաջընթաց չի կարող լինել: 

Բազմափորձ, գրագետ, գիտական աստիճան ունեցող շատ գործիչներ պարտվեցին փայտի գործ անողներին, որոնք անգամ չգիտեն, թե Հայաստանը որ երկրներին է սահմանակցում: Հայաստանի ուղնուծուծն իմացող քաղաքական գործիչները ռեյտինգային համակարգով պարտվեցին գործարանատերերին, տեղական օլիգարխներին, անգամ գյուղում կրպակների ցանց ունեցողներին, որոնք չգիտեն անգամ, թե ինչ է քաղաքականությունը եւ հպարտորեն ասում են, թե իրենք ընդամենը կոճակ սեղմողներ են եւ սպասում են նախագահի հրահանգին:

Եթե ընտրական գործընթացը կրկին չբերվի քաղաքական դաշտ, ապա մեր երկիրը ծանրագույն կորուստներ կկրի, եւ եթե ոմանք կարծում են, որ առանց քաղաքական բարեփոխումների երկարաժամկետ առումով հնարավոր են տնտեսական բարեփոխումները, ապա սխալվում են: Համաշխարհային փորձը, մեր հարեւան երկրների փորձը ցույց է տալիս, որ առանց քաղաքական ազատության անհնար է տնտեսական երկարաժամկետ եւ կայուն զարգացումը:

Եւ այսօր Նաիրա Զոհրաբյանը պայքարում է հենց սրա համար եւ կարծում ենք բոլոր առաջադեմ ուժերը պետք է այս հարցում նրա կողքին լինեն:

Հարցը դեռ քննարկվում է, եւ դեռ ժամանակ ունենք հրաժարվել գորշ եւ հնազանդ մեծամասնության օգնությամբ այս առաջարկը տապալելու մտադրությունից: Ռեյտինգային ընտրական համակարգից ազատվելն այլընտրանք չունի:

Վարդան Մխիթարյան

Top-News.am