Սեյրան Օհանյանը եւ մարտի մեկի երթը. նա դեռ որոշում չունի

Օրերս մամուլում տեղեկու­թյուն տարածվեց, թե պաշտպանության նախկին նախարար Սեյրան Օհանյանը մարտի 1-ին մասնակ­ցելու է 2008թ. մարտի 1-ի իրադարձությունների մեղավորներին պատասխա­նատվության ենթարկելու պահանջով ցույցին:

Պարզվում է, որ Սեյրան Օհանյանը, որը 2008-ի մարտի 1-ին ՀՀ զինված ուժերի գլխավոր շտաբի պետն էր, դեռ որոշում չի կայացրել: Ստացվում է, որ իրոք մեծ է հավանականությունը, որ նա կմասնակցի այդ ցույցին, որի պահանջն է լինելու պատասխանատվության ենթարկել մեղավորներին:

Գուցե ժամանակներն են այդպիսին, որ հարցերն այլեւս բարոյական կողմ չունեն, բայց հուսանք, որ այնուամենայնիվ Սեյրան Օհանյանը ճիշտ որոշում կկայացնի: Ի դեպ, նա դժգոհում է, որ լրատվամիջոցները սուտ լուրեր են հորինում, բայց նա ընդամենը պետք է հստակ հայտարարություն անի, վերջ դնելով լուրերին, իսկ որ ամենակարեւորն է, չպետք է «ամրոցում» փակվեր ապրիլյան ընտրություններից հետո կամ գոնե ընտրություններից հետո ընդհատակ չանցներ:

Եւ վերջապես ժամանակն է, որ այլեւս մարտի 1-ը չօգատգործենք այս կամ այն քաղաքական հարցը շահարկելու համար: Մարտի 1-ը մեր ընդհանուր ողբերգությունն է եւ մարտի մեկի ողբերգությունը չի կարելի օգտագործել սեփական վարկանիշը բարձրացնելու փորձեր անելու համար:

Կառլեն Վարդանյանի ֆեյսբուքյան էջից