Կառավարությունը 328 մլն 218.8 հազար դրամ է հատկացրել բարձր մարզական արդյունքներ գրանցած մարզիկների և մարզիչների անվանական թոշակների համար

Կառավարությունը 328 մլն 218.8 հազար դրամ է հատկացրել Օլիմպիական խաղերում, աշխարհի և Եվրոպայի առաջնություններում բարձր արդյունքներ գրանցած ՀՀ հավաքական թիմերի մարզիկներին և նրանց մարզիչներին անվանական թոշակների տրամադրման նպատակով։ Որոշումն ընդունվել է գործադիրի նիստում։

ՀՀ կառավարության 2020 թվականի հուլիսի 2-ի N 1096-Ն որոշման համաձայն՝ միջազգային հեղինակավոր մրցաշարերում բարձր արդյունքներ գրանցած մարզիկներին և նրանց մարզիչներին տրամադրվում են անվանական թոշակներ։ 2025 թվականին ցուցաբերած մարզական բարձր արդյունքների համար անվանական թոշակ է հատկացվել շուրջ 208 մարզիկի, 161 անձնական և հավաքական թիմերի 58 մարզչի։

2026 թվականի պետական բյուջեով «Մեծ նվաճումների սպորտ» ծրագրի շրջանակում անվանական թոշակների տրամադրման համար նախատեսվել էր շուրջ 735.9 մլն դրամ, որով ապահովվել են հունվար-օգոստոս ամիսների վճարումները։ Տարեկան անհրաժեշտ ֆինանսավորումը կազմում է շուրջ 1 մլրդ 64.1 մլն դրամ, ուստի անվանական թոշակների տրամադրման գործընթացի անընդհատությունն ու ամբողջականությունն ապահովելու համար լրացուցիչ հատկացվել է 328.2 մլն դրամ: Միջոցները վերաբաշխվել են ԿԳՄՍ նախարարության 2026 թվականի պետական բյուջեով նախատեսված ծրագրերից:

Որոշման ընդունմամբ կապահովվի անվանական թոշակների վճարման շարունակականությունը՝ նպաստելով միջազգային մրցասպարեզում բարձր արդյունքներ գրանցած մարզիկների և նրանց մարզիչների պետական աջակցության և խրախուսման պետական քաղաքականության իրականացմանը։