Կառավարությունը հաստատել է վեց հիմնական ապրանքախմբի դրոշմավորման փորձնական ծրագիրը (տեսանյութ)

Հոկտեմբերի 29-ի Կառավարության նիստում Պետական եկամուտների կոմիտեի նախագահի տեղակալ Վրեժ Մխիթարյանը ներկայացրել է «ՀՀ-ում դրոշմավորման փորձնական ծրագրի շրջանակում դրոշմավորման ենթակա ապրանքների ցանկը և ցանկում ներառված ապրանքների դրոշմավորման փորձնական ծրագիրը հաստատելու մասին» որոշման նախագիծը։ Ներկայացված նախագծից բացի Կառավարության նիստի օրակարգում ներառված էին դրոշմավորման փորձնական ծրագիր հաստատելու մասին ևս 5 որոշման նախագիծ։

Որոշման նախագծերը, որոնց նպատակն է հետագայում ընդլայնել ՀՀ-ում դրոշմավորման ենթակա ապրանքների ցանկն, ընդունվել են միաձայն։  

Մասնավորապես, ներկայացված նախագծերով նախատեսվում է 2026 թվականի նոյեմբերի 1-ից 30-ը ներառյալ փորձնական ծրագիր իրականացնել ապրանքների վեց հիմնական խմբերի համար։ Փորձնական ծրագրում կընդգրկվեն հետևյալ ապրանքախմբերը՝

1. Բժշկական արտադրատեսակներ (դեղագործական արտադրանք, հակաբիոտիկներ, վիրակապական նյութեր, հակասեպտիկ և ախտահանիչ միջոցներ, բժշկական ձեռնոցներ/հագուստ, ապակե սրվակներ, լաբորատոր սպասք, հաշմանդամային սայլակներ, ակնոցներ/ոսպնյակներ, բժշկական/վիրաբուժական/ռենտգենյան ապարատներ, բժշկական կահույք և այլն),
2. Սննդամթերք (հրուշակեղեն, կիսապատրաստուկներ և սառեցված արտադրանք),
3. Կոշկեղեն, տան և ինտերիերի պարագաներ, լուսանկարչական ապարատներ,
4. Ավտոպահեստամասեր, դողեր և ավտոդողեր,
5. Պիրոտեխնիկա, հրդեհային անվտանգության սարքավորումներ, խաղալիքներ, հեծանիվներ,
6. Բնական մորթուց հագուստի առարկաներ և պարագաներ:

Փորձնական ծրագրի ընթացքում կփորձարկվեն դրոշմավորման մեխանիզմների և համակարգերի գործառնական հնարավորություններն ու կկատարելագործվեն համապատասխան գործընթացները։ Կապահովվի ՊԵԿ-ի, ազգային օպերատորի ու տնտեսվարողների արդյունավետ փոխգործակցությունը։ Փորձնական ծրագրի ընթացքում կիրականացվի նաև տնտեսվարողների տեղեկատվական համակարգերի ինտեգրումն ազգային օպերատորի համակարգին՝ փորձարկելով ապրանքների շրջանառության ամբողջ գործընթացը՝ նույնականացման ծածկագրի պատվիրումից մինչև ապրանքի շրջանառությունից դուրսբերում։

Տեղեկացնենք, որ տնտեսվարողների մասնակցությունը փորձնական ծրագրին կամավոր է։ Ի դեպ, փորձնական փուլի ամբողջ ընթացքում մասնակիցներին անհրաժեշտ քանակությամբ նույնականացման ծածկագրերը կտրամադրվեն անհատույց։

Հիշեցնենք, որ նույնականացման միջոցներով դրոշմավորման համակարգի ներդրումը կարևոր նշանակություն ունի ստվերային տնտեսության կրճատման, հարկային եկամուտների ավելացման, ապրանքաշրջանառության թափանցիկության բարձրացման և արդար մրցակցային միջավայրի ձևավորման համար։ Դրոշմավորման համակարգի ներդրումը կբարելավի ապրանքների շրջանառության վերահսկողությունը, կնպաստի կեղծ ապրանքների տարածման սահմանափակմանը՝ միաժամանակ պաշտպանելով սպառողների իրավունքները։