Կոտրել են Binance կրիպտոարժութային բորսայի համակարգը եւ առեւանգել 1,7- 5,5 միլիարդ դոլարի կրիպտոարժույթ

Հոկտեմբերի 30-ի գիշերը անհայտ անձինք կոտրել են Binance խոշորագույն կրիպտոարժութային բորսայի համակարգը եւ, տարբեր գնահատականներով, առեւանգել՝ իրենց հաշիվներին փոխանցել, 1,7- 5,5 միլիարդ դոլարի կրիպտոարժույթ։

Binance-ում առայժմ միայն հայտարարել են, որ հետաքննություն են անցկացնում, եւ որ օգտատերերի միջոցները «լիովին անվտանգ են»։ Այնուամենայնիվ, ամբողջ աշխարհում ներդրողներն արդեն արձագանքել են՝ վաճառելով կրիպտոարժույթները։ Բիթքոյնն էժանացել է 3,5 տոկոսով, իսկ եթերը (Ethereum)- ը՝ ավելի քան 4 տոկոսով։

«Կարծես թե Binance-ն իսկապես ենթարկվել է հաքերային հարձակման»,- հայտարարել է Binance-ի նախկին ղեկավար Չանփեն Չժաոն, որը շարունակում է մնալ ընկերության խոշորագույն բաժնետերը։

Ընկերությունից հայտնել են, որ կրիպտոբորսան սառեցրել է ավելի քան 2,5 միլիարդ դոլարի թվային ակտիվներ՝ միջադեպի հետաքննության ընթացքում դրանց հափշտակությունը կանխելու համար։

Այնտեղ նաեւ հավելել են, որ սառեցված միջոցների ծավալը կարող է աճել. ընկերությունը իրավապահ մարմինների եւ գործընկերների հետ շարունակում է որոնել գողացված ակտիվները եւ արգելափակել դրանք։

Tether (USDT) եւ Circle (USDC) ստեյբլքոյնների օպերատորները հայտնել են, որ օպերատիվ կերպով արգելափակել են գողացված 1,7 միլիարդ դոլարը։

Circle-ի ղեկավար Ջերեմի Ալեյրը հայտարարել է, որ ընկերությունը «ուշադիր հետեւում է Binance-ի վրա ազդեցություն ունեցած հնարավոր խոցելիության մասին հաղորդագրություններին» եւ արդեն սառեցրել է միջադեպի հետ կապված ավելի քան 800 միլիոն դոլարի ակտիվներ։

Binance-ն աշխարհում խոշորագույն կրիպտոարժութային բորսան է՝ օրական առեւտրի ծավալով։