Թայվանին զենքի վաճառքի նոր փաթեթի շուրջ որոշում կկայացվի մոտ ապագայում

Չինաստանի նախագահ Սի Ծինփինն այս շաբաթ Վաշինգտոն կատարած այցի ժամանակ ԱՄՆ նախագահ Դոնալդ Թրամփից կպահանջի դադարեցնել զենքի վաճառքը Թայվանին՝ վկայակոչելով 1982 թվականի երկկողմ համատեղ հայտարարությունը. գրում է Reuters-ը հղում անելով իր աղբյուրներին։

Թայվանի հարցը Պեկինի կողմից պարբերաբար բնութագրվում է որպես Չինաստանի ամենազգայուն դիվանագիտական խնդիրը, և Չինաստանը բազմիցս պահանջել է դադարեցնել զենքի մատակարարումները կղզուն։

ԱՄՆ-ն, ըստ օրենքի, պարտավոր է ժողովրդավարական Թայվանին տրամադրել ինքնապաշտպանության միջոցներ՝ չնայած պաշտոնական դիվանագիտական հարաբերությունների բացակայությանը, մինչդեռ Թայվանի կառավարությունը մերժում է Պեկինի ինքնիշխանության հավակնությունները։

Reuters-ի աղբյուրների խոսքով՝ Սի Ծինփինը, հավանաբար, կբարձրացնի նաև 1982 թվականի երեք «համատեղ կոմյունիկեներից» երրորդի իր մեկնաբանության հարցը։ Այդ համաձայնագրով ԱՄՆ-ն հայտարարել էր Թայվանին զենքի վաճառքն աստիճանաբար կրճատելու մտադրության մասին՝ առանց երկարաժամկետ մատակարարումների նպատակ ունենալու։ Սակայն ուղեկցող գրության մեջ այն ժամանակվա նախագահ Ռոնալդ Ռեյգանն ընդգծել էր, որ այդ պատրաստակամությունը «բացարձակապես պայմանավորված է» Թայվանի հարցի խաղաղ կարգավորման շուրջ Չինաստանի անփոփոխ հանձնառությամբ։

Սի Ծինփինը Վաշինգտոն կժամանի չորեքշաբթի, պաշտոնական բանակցություններն անցկացվելու են հինգշաբթի։ Սպիտակ տան ներկայացուցչի փոխանցմամբ՝ Թրամփը հայտնել է, որ Թայվանին զենքի վաճառքի նոր փաթեթի շուրջ որոշում կկայացվի մոտ ապագայում։ Պաշտոնյան նշել է, որ իր առաջին ժամկետում Թրամփը հաստատել էր Թայվանին զենքի ամենամեծ ծավալի վաճառքը պատմության մեջ, իսկ երկրորդ ժամկետի առաջին տարում՝ ավելի շատ, քան ամբողջ Բայդենի նախագահության ընթացքում։