Ուկրաինայի և Գերմանիայի քաղաքացին մեղադրվում է հօգուտ Ռուսաստանի լրտեսության համար

Գերմանիայի գլխավոր դատախազությունը մեղադրանք է առաջադրել Բեռլինում բնակվող կին գործարար Իլոնա Վիներին։ Նա Գերմանիայի և Ուկրաինայի քաղաքացի է և, ըստ մեղադրանքի, լրտեսել է Ռուսաստանի օգտին։ Լեհաստանի և Ուկրաինայի արտաքին գործերի նախարարները ավելի վաղ զգուշացրել էին նոր էսկալացիայի վտանգի մասին, որին հանգեցնում է նաև լրտեսների առկայությունը։

Գերմանիայի գլխավոր դատախազությունը լրտեսության մեղադրանք է առաջադրել 57-ամյա կին գործարար Իլոնա Վիներին։ Ըստ լրատվամիջոցների հրապարակումների՝ նա Գերմանայի և Ուկրաինայի քաղաքացի է։ Spiegel-ի հրապարակած 74-էջանոց մեղադրական եզրակացության համաձայն՝ նա լրտեսություն է արել Ռուսաստանի օգտին: Սակայն այդ մեղադրանքը ներկայացվել է նրա ձերբակալությունից գրեթե ութ ամիս անց։

Ըստ մեղադրանքի՝ Վիները 2023 թվականի նոյեմբերից տեղեկություններ է հաղորդել Բեռլինում Ռուսաստանի դեսպանատան աշխատակցին: Գերմանական հակահետախուզությունը դեսպանատան այդ կոնտակտին նույնականացրել է որպես ռազմական հետախույզ Անդրեյ Մայորով։ Դեսպանատանը նա կատարել է ռազմական կցորդի տեղակալի պարտականությունները: Մայորովը ստիպված է եղել լքելու Գերմանիան այս տարվա սկզբին: Spiegel-ը գրում է, որ գործարար Իլոնա Վիները տեղեկություններ է հավաքել քաղաքական հանդիպումների մասնակիցների մասին։ Այդ տեղեկությունները վերաբերել են մասնավորապես 2023 թվականի նոյեմբերին Բեռլինի «Ադլոն» հյուրանոցում տեղի ունեցած ՆԱՏՕ-ի քննարկմանը և 2025 թվականի դեկտեմբերին Բեռլինի գերմանա-ուկրաինական տնտեսական ֆորումին։ Այդ հանդիպման ժամանակ, ըստ հրապարակումների, Վիները նստած է եղել կանցլեր Ֆրիդրիխ Մերցից և Ուկրաինայի նախագահ Վլադիմիր Զելենսկիից մի քանի մետր հեռավորության վրա։

Ուկրաինայի և Լեհաստանի արտաքին գործերի նախարարները մի քանի օր առաջ երկու երկրների սահմանին ռուսական հարվածից հետո արդեն զգուշացրել էին, որ եվրոպական անվտանգությանը սպառնացող ռուսական վտանգների շարքում նաև լրտեսությունն է։

Ուկրաինայի արտաքին գործերի նախարար Անդրեյ Սիբիհան այսպիսի հայտարարություն էր արել․

«Ռուսական հարվածներն այժմ Ուկրաինա-Լեհաստան սահմանի մոտակայքում են։ Պուտինի ահաբեկչությունը բառացիորեն թակում է Եվրամիության և ՆԱՏՕ-ի դռները: Հենց այդ պատճառով էլ այժմ մասնակի միջոցառումները բավարար չեն: Անհրաժեշտ են խիստ պատժամիջոցներ, Ուկրաինային շարունակական ռազմական աջակցություն և Ռուսաստանի վրա առավելագույն ճնշում»:

Լեհաստանի արտաքին գործերի նախարար Ռադոսլավ Սիկորսկին էլ մեղադրում է Ռուսաստանին եվրոպական երկրների դեմ հիբրիդային պատերազմ սկսելու համար․

«Դա պարզապես դռան թակոց չէ, այլ տան ներսում է։ Հիշեցնում եմ ձեզ, որ ռուսական հիբրիդային պատերազմը կինետիկ է։ Դա պարզապես ինտերնետում ինչ-որ անհարմարություն չէ։ Դա պարզապես կեղծ տեղեկատվություն չէ։ Դա պարզապես լրտեսություն չէ։ Մենք Լեհաստանում հրկիզման դեպքեր ենք ունեցել, Լիտվայում ինքնաթիռներ խփելու փորձեր ենք ունեցել։ Լեհաստանում շարժվող գնացքի գիծը խլելու փորձ ենք տեսել։ Նրանք ձախողվել են միայն իրենց անգործունակության պատճառով։ Հարձակում է եղել Լայպցիգի օդանավակայանի վրա, և Պուտինը մահվան ջոկատներ է ուղարկել Մեծ Բրիտանիա, Գերմանիա և այլ երկրներ։ Ուրեմն, սա պարզապես ռուսական գործունեության այս սպեկտրի ևս մի էսկալացիա է»։

Գերմանիայի դատախազությունը պնդում է նաև, որ 2024 թվականի փետրվարին լրտեսության համար մեղադրվող գործարարը կեղծ անվամբ իր ենթադրյալ օգնական Անդրեյ Մայորովին գաղտնի տեղափոխել է Բունդեսվերի պահեստազորայինների հետ հանդիպման։

Լրտեսության համար մեղադրվող Իլոնա Վիները Բեռլինի հայտնի գործարարներից է։ Նա նաև ղեկավարում էր Ժողովուրդների միջև փոխըմբռնման ամրապնդման ասոցիացիան և պարբերաբար մասնակցում էր տարբեր երկրների դեսպանների, բարձրաստիճան դիվանագետների և ականավոր քաղաքական գործիչների հանդիպումներին։

Նրա կազմակերպության հոգաբարձուների խորհուրդ էին ընդգրկված ականավոր ձեռնարկատերեր և նախկին պատգամավորներ։

Վիների ձերբակալության մասին հայտարարվեց հունվարին: Գարնանը, սակայն, Իլոնա Վիների պաշտպանները նրա ձերբակալությունը վիճարկող միջնորդությամբ քննադատել էին դատախազությանը արտաքին հետախուզության շահերից ելնելով լրտեսության հանցագործության մասին «լայն մեկնաբանության» համար:

armradio.am