Երկօրյա ընդմիջումից հետո ԱՄՆ ու Իրանը փոխադարձ հարվածներ են հասցրել

ԱՄՆ-ի Կենտրոնական հրամանատարությունը X սոցիալական ցանցում պաշտոնապես հայտնել է, որ երեքշաբթի ամերիկացի զինվորականները ոչնչացրել են «իրանական հինգ նավթատար», որոնք տեղափոխում էին հում նավթ։ Սա պատասխանն է Իսլամական հեղափոխության պահապանների կորպուսի գործողություններին, որը վերջին երկու օրվա ընթացքում երկու անգամ բալիստիկ հրթիռներով փորձել է հարձակվել ԱՄՆ ռազմածովային ուժերի ռազմանավի վրա։

Ավելի վաղ CNN-ը եւ Reuters-ը, հղում անելով աղբյուրներին, հայտնել էին, որ ամերիկացի զինվորականները հարվածներ են հասցրել ԻՀՊԿ-ի հետ կապված մի քանի իրանական նավթատարների։ Ամերիկյան հարվածները վերսկսվել են երկօրյա դադարից հետո։

Իրանական Tasnim գործակալությունը հայտնել է, որ ամերիկյան հրթիռը հարվածել է նավթատարին՝ Խարկ կղզու իրանական գլխավոր նավթային տերմինալից վեց կիլոմետր հեռավորության վրա, իսկ պետական հեռուստառադիոընկերությունը հայտնել է Օմանի ծոցում՝ Ջասք նավահանգստի մոտ, մեկ այլ նավթատարի վրա հարձակման մասին։

Իրանի Իսլամական հեղափոխության պահապանների կորպուսը (ԻՀՊԿ) հայտարարել է, որ ԱՄՆ-ի գործողություններին ի պատասխան՝ Պարսից ծոցում հարձակվել է ամերիկյան երկու նավի եւ ութ նավթատարի վրա։

ԻՀՊԿ-ի հաղորդագրության մեջ նշվում է, որ հարձակման ենթարկված 10 նավերը փորձել են անցնել Հորմուզի նեղուցի այն հատվածով, որը իրանական կողմը անվանել է «արգելված եւ վտանգավոր»։

ԻՀՊԿ-ն նաեւ հայտնել է ամերիկյան երկու էսկադրային ականակիրների վրա հարձակման մասին։ ԱՄՆ-ի ռազմական հրամանատարությունը չի մեկնաբանել այդ հաղորդագրությունները։

Բացի այդ, Իրանը հայտնել է Հորդանանում գտնվող «Ալ-Ազրաք» ամերիկյան ռազմակայանին բալիստիկ հրթիռներով հարվածելու մասին։ Հորդանանը հայտնել է, որ հակաօդային պաշտպանության միջոցները որսացել են իրանական 20 հրթիռներից 18-ը, եւս երկուսն ընկել են անմարդաբնակ տարածքում։